ஜிம்பாப்வேயை 90 ரன்கள் வித்தியாசத்தில் வீழ்த்திய இந்தியா; டி20 தொடரை 2-0 என கைப்பற்றியது
ஜிம்பாப்வே அணிக்கு எதிரான இரண்டாவது டி20 போட்டியில் இந்திய அணி அபார ஆட்டத்தை வெளிப்படுத்தி 90 ரன்கள் வித்தியாசத்தில் வெற்றி பெற்றது. இந்த வெற்றியின் மூலம் மூன்று போட்டிகள் கொண்ட டி20 தொடரை இந்தியா 2-0 என்ற கணக்கில் கைப்பற்றி, ஒரு போட்டி மீதமிருக்கும்போதே தொடரை தனதாக்கிக் கொண்டது. சமீபத்திய தொடர் தோல்விகளுக்குப் பிறகு இந்திய அணிக்கு இந்த வெற்றி முக்கிய திருப்புமுனையாக அமைந்துள்ளது.
ஜிம்பாப்வே சுற்றுப்பயணத்தில் டி20 தொடரில் விளையாடி வரும் இந்திய அணி, முதல் போட்டியிலும் வெற்றி பெற்றிருந்தது. அதன் தொடர்ச்சியாக நடைபெற்ற இரண்டாவது ஆட்டத்தில் முதலில் பேட்டிங் செய்த இந்தியா, 20 ஓவர்களில் 5 விக்கெட் இழப்புக்கு 219 ரன்கள் குவித்து வலுவான இலக்கை நிர்ணயித்தது. தொடக்க வீரர் இஷான் கிஷன் 44 பந்துகளில் 81 ரன்கள் குவித்து அணியின் ஸ்கோரை உயர்த்தினார். திலக் வர்மா 29 பந்துகளில் அதிரடியாக 60 ரன்கள் சேர்த்தார். கேப்டன் ஸ்ரேயஸ் 25 ரன்களும், வைபவ் சூர்யவன்ஷி 20 ரன்களும் எடுத்தனர்.
220 ரன்கள் என்ற கடினமான இலக்கை நோக்கி களமிறங்கிய ஜிம்பாப்வே அணி, இந்திய பந்துவீச்சாளர்களின் கட்டுப்பாடான தாக்குதலை சமாளிக்க முடியாமல் தொடர்ந்து விக்கெட்டுகளை இழந்தது. 17.5 ஓவர்களில் 129 ரன்களுக்கு அந்த அணி ஆல் அவுட்டானது. ஜிம்பாப்வே தரப்பில் பிரையன் பென்னட் 32 ரன்கள், மருமானி 24 ரன்கள், ரியான் 20 ரன்கள் எடுத்தாலும், அணியை தோல்வியில் இருந்து காப்பாற்ற முடியவில்லை.
இந்திய அணியின் பந்துவீச்சில் அபிஷேக் சர்மா 3 விக்கெட்டுகள் கைப்பற்றி சிறப்பாக செயல்பட்டார். யஷ் தாக்குர் மற்றும் பிரின்ஸ் யாதவ் தலா 2 விக்கெட்டுகளை வீழ்த்தினர். ரவி பிஷ்னோய், ஷிவம் துபே மற்றும் திலக் வர்மா ஆகியோர் தலா ஒரு விக்கெட் கைப்பற்றி வெற்றியில் பங்களித்தனர். இந்த வெற்றியால் இந்திய அணி தொடரை உறுதிப்படுத்தியுள்ள நிலையில், இரு அணிகளுக்கும் இடையிலான மூன்றாவது மற்றும் கடைசி டி20 போட்டி நாளை நடைபெற உள்ளது.
