ஆஸ்திரேலியாவை அதன் சொந்த மண்ணில் வீழ்த்தி வங்கதேசம் வரலாற்று டெஸ்ட் வெற்றி
ஆஸ்திரேலியாவுக்கு எதிரான முதல் டெஸ்ட் போட்டியில் வங்கதேச அணி 9 விக்கெட் வித்தியாசத்தில் வெற்றி பெற்று வரலாறு படைத்துள்ளது. இதன் மூலம் ஆஸ்திரேலிய மண்ணில் அந்த அணியை டெஸ்ட் போட்டியில் முதல் முறையாக வீழ்த்திய பெருமையை வங்கதேசம் பெற்றுள்ளது. இரண்டு போட்டிகள் கொண்ட தொடரில் 1-0 என்ற கணக்கில் வங்கதேச அணி முன்னிலை வகிக்கிறது.
டார்வினில் உள்ள மராரா மைதானத்தில் கடந்த 13-ம் தேதி தொடங்கிய முதல் டெஸ்டில், முதலில் பேட் செய்த ஆஸ்திரேலிய அணி 198 ரன்களுக்கு ஆட்டமிழந்தது. ஸ்டீவன் ஸ்மித் 71 ரன்கள் எடுத்த நிலையில், வங்கதேசத்தின் ஹசன் மஹ்மூத் சிறப்பாக பந்துவீசி 6 விக்கெட்டுகளை வீழ்த்தினார். தொடர்ந்து முதல் இன்னிங்ஸை விளையாடிய வங்கதேசம் 138 ஓவர்களில் 426 ரன்கள் குவித்து, 228 ரன்கள் முன்னிலை பெற்றது. தன்ஸித் ஹசன் தமீம் 101, கேப்டன் நஜ்முல் ஹொசைன் ஷான்டோ 84, மெஹிதி ஹசன் மிராஸ் 65 ரன்கள் சேர்த்தனர்.
இரண்டாவது இன்னிங்ஸில் ஆஸ்திரேலிய அணி 284 ரன்களுக்கு அனைத்து விக்கெட்டுகளையும் இழந்தது. ஒரு புறம் விக்கெட்டுகள் சரிந்தாலும் கேமரூன் கிரீன் சிறப்பாக விளையாடி சதம் அடித்தார். அவர் 201 பந்துகளில் 104 ரன்கள் எடுத்தார். வங்கதேசத்தின் மெஹிதி ஹசன் மிராஸ் 5 விக்கெட்டுகளையும், ஹசன் மஹ்மூத் 3 விக்கெட்டுகளையும் வீழ்த்தினர். தஸ்கின் அகமது, தைஜுல் இஸ்லாம் ஆகியோர் தலா ஒரு விக்கெட்டை கைப்பற்றினர்.
இதையடுத்து வெற்றிக்கு 57 ரன்கள் என்ற இலக்குடன் களமிறங்கிய வங்கதேசத்துக்கு தொடக்கத்திலேயே அதிர்ச்சி ஏற்பட்டது. தன்ஸித் ஹசன் தமீம் ரன் ஏதும் எடுக்காமல் ஜோஷ் ஹேசில்வுட் பந்துவீச்சில் ஆட்டமிழந்தார். பின்னர் ஷத்மன் இஸ்லாம் மற்றும் மோமினுல் ஹக் இணைந்து அணியை வெற்றிப் பாதைக்கு அழைத்துச் சென்றனர். 14.2 ஓவர்களில் ஒரு விக்கெட்டை மட்டுமே இழந்து 57 ரன்களை எட்டிய வங்கதேசம் 9 விக்கெட் வித்தியாசத்தில் வெற்றியைப் பதிவு செய்தது. ஷத்மன் இஸ்லாம் 25 ரன்களுடனும், மோமினுல் ஹக் 30 ரன்களுடனும் ஆட்டமிழக்காமல் இருந்தனர்.
இந்தப் போட்டியில் இரண்டு இன்னிங்ஸ்களிலும் சேர்த்து 9 விக்கெட்டுகளை வீழ்த்திய ஹசன் மஹ்மூத் ஆட்ட நாயகனாகத் தேர்வு செய்யப்பட்டார். முதல் இன்னிங்ஸில் 6 விக்கெட்டுகளையும், இரண்டாவது இன்னிங்ஸில் 3 விக்கெட்டுகளையும் கைப்பற்றிய அவரது பந்துவீச்சு வங்கதேசத்தின் வெற்றியில் முக்கிய பங்கு வகித்தது.
ஆஸ்திரேலிய மண்ணில் ஆஸ்திரேலிய அணிக்கு எதிரான டெஸ்ட் போட்டியில் வங்கதேசம் பெற்றுள்ள முதல் வெற்றி இதுவாகும். மேலும், கடந்த 31 ஆண்டுகளில் இந்திய அணியைத் தவிர மற்றொரு ஆசிய அணியிடம் ஆஸ்திரேலியா தனது சொந்த மண்ணில் டெஸ்ட் போட்டியில் தோல்வியடைந்திருப்பது இதுவே முதல் முறை என தெரிவிக்கப்பட்டுள்ளது. டெஸ்ட் போட்டிகளில் வங்கதேசம் பெற்றுள்ள 9 விக்கெட் வித்தியாச வெற்றி, அந்த அணியின் இரண்டாவது மிகப்பெரிய வெற்றியாகவும் அமைந்துள்ளது.
இதற்கு முன்பு ராவல்பிண்டியில் பாகிஸ்தானை 10 விக்கெட் வித்தியாசத்தில் வீழ்த்தியதே வங்கதேசத்தின் மிகப்பெரிய டெஸ்ட் வெற்றியாகும். மேலும், சேனா நாடுகளான தென் ஆப்பிரிக்கா, இங்கிலாந்து, நியூஸிலாந்து மற்றும் ஆஸ்திரேலியாவுக்கு எதிரான டெஸ்ட் போட்டிகளில் வங்கதேசம் பெற்றுள்ள இரண்டாவது வெற்றி இதுவாகும். 2022-ல் மவுண்ட் மவுங்கனுயில் நியூஸிலாந்தை வீழ்த்தியதும் அந்த அணியின் குறிப்பிடத்தக்க வெற்றிகளில் ஒன்றாகும்.
ஆஸ்திரேலியாவுக்கு எதிராக வங்கதேசம் பெற்றுள்ள இரண்டாவது டெஸ்ட் வெற்றியும் இதுவாகும். இதற்கு முன்பு 2017-ம் ஆண்டு மிர்பூரில் நடைபெற்ற டெஸ்ட் போட்டியில் ஆஸ்திரேலியாவை வங்கதேசம் வீழ்த்தியிருந்தது. இரு அணிகளுக்கு இடையிலான தொடரின் இரண்டாவது டெஸ்ட் போட்டி வரும் 22-ம் தேதி மெக்கே நகரில் உள்ள கிரேட் பேரியர் ரீஃப் அரீனா மைதானத்தில் தொடங்க உள்ளது.
