தமிழக பட்ஜெட்டுக்கு மு.க.ஸ்டாலின் கடும் விமர்சனம்: ‘திமுக திட்டங்களின் ரீமேக் வெர்ஷன்’ என குற்றச்சாட்டு
தமிழக அரசின் 2026–27-ஆம் ஆண்டுக்கான முதல் வரவு-செலவுத் திட்டத்திற்கு திமுக தலைவர் மு.க.ஸ்டாலின் கடும் விமர்சனம் தெரிவித்துள்ளார். இந்த பட்ஜெட் புதிய தொலைநோக்கு திட்டங்கள் இல்லாததுடன், திமுக ஆட்சியில் செயல்படுத்தப்பட்ட திட்டங்களின் “ரீமேக் வெர்ஷன்” மட்டுமே என அவர் குற்றம்சாட்டியுள்ளார். மேலும், அரசு அளித்த முக்கிய தேர்தல் வாக்குறுதிகள் குறித்து எந்த அறிவிப்பும் இடம்பெறவில்லை என்றும் அவர் தெரிவித்துள்ளார்.
இதுகுறித்து தனது எக்ஸ் சமூக வலைதளப் பதிவில், சட்டப்பேரவையில் தாக்கல் செய்யப்பட்ட பட்ஜெட் மக்கள் மத்தியில் பெரும் எதிர்பார்ப்பை ஏற்படுத்தியிருந்தாலும், அந்த எதிர்பார்ப்பை பூர்த்தி செய்யத் தவறிவிட்டதாக மு.க.ஸ்டாலின் விமர்சித்தார். “பிளாஸ்ட்” ஆக இருக்கும் என எதிர்பார்த்த மக்களுக்கு, “வேஸ்ட்” எனக் கூறும் அளவுக்கு ஏமாற்றமளிக்கும் பட்ஜெட்டாக இது அமைந்துள்ளதாகவும், திராவிட மாடல் அரசின் திட்டங்களை மீண்டும் வெளியிட்டதுபோலவே இந்த பட்ஜெட் இருப்பதாகவும் அவர் குறிப்பிட்டுள்ளார்.
விவசாயிகள் எதிர்கொள்ளும் சிக்கல்கள், மின் கட்டணக் குளறுபடிகள், விலைவாசி உயர்வு போன்ற முக்கிய பிரச்சினைகளுக்கு தீர்வு காணும் வகையிலான அறிவிப்புகள் பட்ஜெட்டில் இடம்பெறவில்லை என்றும், மாநிலத்தின் எதிர்கால வளர்ச்சிக்குத் தேவையான புதிய தொலைநோக்குத் திட்டங்களும் அறிவிக்கப்படவில்லை என்றும் அவர் தெரிவித்துள்ளார்.
அதேபோல், தேர்தல் காலத்தில் அறிவிக்கப்பட்ட முக்கிய வாக்குறுதிகளான மகளிருக்கு மாதம் ரூ.2,500 உரிமைத்தொகை, வேலையில்லா இளைஞர்களுக்கு ரூ.4,000 உதவித்தொகை, ஆண்டுக்கு ஆறு இலவச எரிவாயு சிலிண்டர்கள் மற்றும் முழுமையான பயிர்க்கடன் தள்ளுபடி உள்ளிட்ட திட்டங்கள் குறித்து பட்ஜெட்டில் எந்த அறிவிப்பும் இடம்பெறவில்லை என மு.க.ஸ்டாலின் சுட்டிக்காட்டியுள்ளார்.
மொத்தத்தில், சொந்த சிந்தனை இல்லாத, அளிக்கப்பட்ட வாக்குறுதிகளை நிறைவேற்றாத, மக்கள் எதிர்பார்ப்புகளை பூர்த்தி செய்யத் தவறிய பட்ஜெட்டாக தமிழக அரசின் முதல் நிதிநிலை அறிக்கை அமைந்துள்ளதாகவும், இதை “ரீல் அரசின் முதல் பட்ஜெட்” என விமர்சித்தும் திமுக தலைவர் மு.க.ஸ்டாலின் தனது கருத்தை பதிவு செய்துள்ளார்.
