உலக செஸ் சாம்பியன்ஷிப்: நவம்பர் 25 முதல் ஜெனிவாவில் குகேஷ் – ஜவோகிர் சிந்தரோவ் பலப்பரீட்சை
நடப்பு உலக செஸ் சாம்பியனான இந்தியாவின் டி. குகேஷ் மற்றும் உஸ்பெகிஸ்தான் கிராண்ட்மாஸ்டர் ஜவோகிர் சிந்தரோவ் மோதும் ஃபிடே உலக செஸ் சாம்பியன்ஷிப் போட்டி, சுவிட்சர்லாந்தின் ஜெனிவா நகரில் நவம்பர் 25 முதல் டிசம்பர் 15 வரை நடைபெற உள்ளது. இந்த போட்டிக்கான அதிகாரப்பூர்வ அட்டவணையை ஃபிடே வெளியிட்டுள்ளது.
இந்த சாம்பியன்ஷிப் தொடங்கும் நேரத்தில் குகேஷ் மற்றும் ஜவோகிர் சிந்தரோவ் ஆகிய இருவருக்கும் 20 வயது மட்டுமே இருக்கும். இதன் மூலம் உலக செஸ் சாம்பியன்ஷிப் வரலாற்றில் மிகக் குறைந்த வயதில் நேருக்கு நேர் மோதும் வீரர்கள் என்ற புதிய சாதனையை இருவரும் படைக்க உள்ளனர்.
உலக சாம்பியன்ஷிப் தொடர் மொத்தம் 14 கிளாசிக்கல் சுற்றுகளாக நடத்தப்படும். இதில் முதலில் 7.5 புள்ளிகளைப் பெறும் வீரர் உலக செஸ் சாம்பியனாக அறிவிக்கப்படுவார். 14 சுற்றுகள் நிறைவடையும் முன்பே ஒருவர் வெற்றிக்குத் தேவையான புள்ளிகளை எட்டிவிட்டால், மீதமுள்ள ஆட்டங்கள் நடத்தப்படாது.
ஒருவேளை 14 கிளாசிக்கல் ஆட்டங்களின் முடிவில் இரு வீரர்களும் தலா 7 புள்ளிகள் பெற்று சமநிலையில் இருந்தால், சாம்பியனைத் தீர்மானிக்க டைபிரேக் சுற்றுகள் நடத்தப்படும். அந்த போட்டிகளின் முடிவில் வெற்றி பெறும் வீரரே புதிய உலக செஸ் சாம்பியனாக முடிசூடுவார்.
