தேசிய திரைப்பட விருதுகளை வென்ற தமிழ் திரைக் கலைஞர்களுக்கு நடிகர் சரத்குமார் வாழ்த்து
தேசிய திரைப்பட விருதுகளில் பல்வேறு பிரிவுகளில் வெற்றி பெற்று தமிழ்த் திரையுலகிற்குப் பெருமை சேர்த்துள்ள திரைக் கலைஞர்கள் அனைவருக்கும் நடிகரும் முன்னாள் நாடாளுமன்ற உறுப்பினருமான சரத்குமார் தனது மனமார்ந்த வாழ்த்துகளைத் தெரிவித்துள்ளார். இந்த விருதுகள் தமிழ் சினிமாவின் படைப்பாற்றல் மற்றும் தொழில் நுட்பத் திறனுக்குக் கிடைத்த உயரிய மரியாதை என்றும் அவர் குறிப்பிட்டுள்ளார்.
சிறந்த தமிழ்த் திரைப்படமாகத் தேர்வாகியுள்ள ‘ராயன்’ படத்திற்கும், ‘கேப்டன் மில்லர்’ படத்திற்காகச் சிறந்த நடிகர் சிறப்பு விருது மற்றும் சுற்றுச்சூழல் சார்ந்த விருதையும் பெற்று, தனது திரைப்பயணத்தில் 5-வது முறையாகத் தேசிய விருது வென்றுள்ள நடிகர் தனுஷுக்கு அவர் வாழ்த்து தெரிவித்துள்ளார். மேலும், ‘அமரன்’ படத்தின் பின்னணி இசைக்காக 3-வது முறையாகத் தேசிய விருது பெறும் ஜி.வி.பிரகாஷ் குமாருக்கும் பாராட்டுகளைத் தெரிவித்துள்ளார்.
அதேபோல் ‘அமரன்’ படத்திற்காகச் சிறந்த இயக்குநராகத் தேர்வாகியுள்ள ராஜ்குமார் பெரியசாமி, சிறந்த படத்தொகுப்பாளர் கலைவாணன், ‘மகாராஜா’ படத்திற்காகச் சிறந்த துணை நடிகையாகத் தேர்வான சாச்சனா நமிதாஸ், சிறந்த சண்டைப் பயிற்சியாளர் அனல் அரசு ஆகியோருக்கும் சரத்குமார் தனது மகிழ்ச்சியையும் வாழ்த்துகளையும் பகிர்ந்து கொண்டுள்ளார்.
மேலும், ஆவணப் படத்திற்காகச் சிறந்த ஒலி வடிவமைப்பு விருது வென்ற டி.எஸ்.ஹரிஹர சுதன், ‘மெய்யழகன்’ படத்திற்காகச் சிறந்த ஒலிக் கலவை விருது வென்ற சுரேன் ஜி உள்ளிட்ட அனைத்துத் தொழில்நுட்பக் கலைஞர்களுக்கும் வாழ்த்து தெரிவித்துள்ள அவர், விருதை வென்ற கலைஞர்கள் அனைவரும் எதிர்காலத்தில் மேலும் பல சாதனைகளைப் படைக்க வாழ்த்துவதாகக் கூறியுள்ளார்.
