கேப்டன் மில்லர், ராயன் படங்களின் தேசிய விருது குறித்து நடிகர் தனுஷ் நெகிழ்ச்சி அறிக்கை!
மத்திய அரசால் 72-வது தேசிய திரைப்பட விருதுகள் அதிகாரப்பூர்வமாக அறிவிக்கப்பட்டுள்ளன. இதில், நடிகர் தனுஷ் இயக்கி, நடித்த ‘ராயன்’ திரைப்படத்திற்கு 2024-ம் ஆண்டுக்கான சிறந்த தமிழ்ப் படத்திற்கான (சிறந்த பிராந்தியத் திரைப்படம்) தேசிய விருது கிடைத்துள்ளது. அத்துடன், அருண் மாதேஸ்வரன் இயக்கத்தில் தனுஷ் நடித்த ‘கேப்டன் மில்லர்’ படத்திற்குச் சிறந்த சமூக அக்கறையுடனான படைப்புக்கான தேசிய விருது அறிவிக்கப்பட்டுள்ள நிலையில், அப்படத்தில் நடித்ததற்காகத் தனுஷிற்குச் சிறந்த நடிகருக்கான ‘சிறப்புக் குறிப்பு’ (Special Mention) கௌரவம் வழங்கப்பட்டுள்ளது.
இந்த இரட்டை அங்கீகாரம் குறித்து நடிகர் தனுஷ் நெகிழ்ச்சியுடன் அறிக்கை ஒன்றை வெளியிட்டுள்ளார். அதில், “ராயன் மற்றும் கேப்டன் மில்லர் ஆகிய படங்களுக்காக தேசிய விருதுகளைப் பெற்றதில் நான் உண்மையிலேயே பணிவும் பெருமகிழ்ச்சியும் அடைகிறேன்; இந்த விருதுகளை அறிவித்த மதிப்புக்குரிய தேசிய விருதுகள் நடுவர் குழுவிற்கும், தேர்வு முகமைக்கும் எனது மனமார்ந்த நன்றிகளைத் தெரிவித்துக் கொள்கிறேன்” என்று அவர் குறிப்பிட்டுள்ளார்.
மேலும், தனது திரையுலகப் பயணம் முழுவதும் தங்களின் மாறாத ஆதரவை வழங்கி வரும் பத்திரிகை, ஊடகம் மற்றும் சமூக ஊடகத் துறையினருக்கும் அவர் நன்றி தெரிவித்துள்ளார். ஒரு நடிகராகத் தனக்குக் கிடைக்கும் மூன்றாவது தேசிய விருது இது என்றும், ஒரு இயக்குநராகத் தனது முதல் தேசிய விருது இது என்றும் குறிப்பிட்டுள்ள தனுஷ், தனது பலத்தின் தூண்களாக விளங்கும் ரசிகர்கள் இல்லாமல் இதில் எதுவுமே சாத்தியமாகி இருக்காது என்று நெஞ்சாரக் கூறியுள்ளார்.
‘கேப்டன் மில்லர்’ படத்திற்கான அங்கீகாரம் தனது இதயத்திற்கு மிகவும் நெருக்கமானது என்று குறிப்பிட்டுள்ள தனுஷ், இன்றுவரை அதுவே தனது மிகச்சிறந்த நடிப்பு என்று தான் எப்போதும் நம்புவதாகவும், தான் மிகவும் போற்றுகிற ஒரு நடிப்புக்காக இந்தச் ‘சிறப்பு குறிப்பு’ கௌரவத்தைப் பெறுவது இந்த அங்கீகாரத்தை இன்னும் அர்த்தமுள்ளதாக்குகிறது என்றும் நெகிழ்ந்துள்ளார்.
இறுதியாக, முதலாவது சாதனை என்பது எப்போதும் மறக்க முடியாதது என்று குறிப்பிட்ட அவர், “ராயன் திரைப்படத்திற்காக ஒரு இயக்குநராக எனது முதல் தேசிய விருதை வென்றது நான் என்றும் போற்றி மகிழும் ஒரு ஆசியாகும்; நான் எப்போதும் சொல்வது போல், எண்ணம் போல் வாழ்க்கை” என்று மகிழ்ச்சியுடன் தனது அறிக்கையை நிறைவு செய்துள்ளார்.
