தங்கம் பவுனுக்கு ரூ.2,160 உயர்வு: தொடர்ந்து 2-வது நாளாக விலை ஏற்றம், வெள்ளியும் கிலோவுக்கு ரூ.10,000 அதிகரிப்பு
சென்னையில் தங்கத்தின் விலை தொடர்ந்து இரண்டாவது நாளாக உயர்ந்துள்ளது. இன்று (ஆகஸ்ட் 6) காலை வர்த்தகம் தொடங்கியதும், 22 காரட் ஆபரணத் தங்கத்தின் விலை பவுனுக்கு ரூ.2,160 உயர்ந்து, ஒரு பவுன் ரூ.1,10,000 என்ற புதிய உச்ச விலையில் விற்பனையாகிறது. இதேபோல் வெள்ளி விலையும் கணிசமாக உயர்ந்து, ஒரு கிலோ ரூ.2,50,000-க்கு விற்பனையாகிறது.
சர்வதேச பொருளாதார சூழல், அரசியல் பதற்றம், கச்சா எண்ணெய் விலை மாற்றம், அமெரிக்க டாலருக்கு எதிரான இந்திய ரூபாயின் மதிப்பு, தங்கத்தின் மீதான முதலீட்டு தேவை மற்றும் உலக பங்குச் சந்தை நிலவரம் உள்ளிட்ட பல்வேறு காரணிகள் தங்கத்தின் விலையை தீர்மானிக்கின்றன. குறிப்பாக, உலகளவில் நிலவும் பொருளாதார நிச்சயமற்ற சூழல் தங்கத்தின் மீதான முதலீட்டு ஆர்வத்தை அதிகரித்துள்ளதாக சந்தை வல்லுநர்கள் தெரிவிக்கின்றனர்.
மேலும், அமெரிக்கா – ஈரான் இடையேயான பதற்றமான சூழல் சர்வதேச தங்க சந்தையில் தாக்கத்தை ஏற்படுத்தியுள்ளது. அதேசமயம், கடந்த மே மாதம் மத்திய அரசு தங்கத்தின் மீதான சுங்க வரியை 6 சதவீதத்தில் இருந்து 15 சதவீதமாக உயர்த்தியதன் தாக்கமும் உள்நாட்டு சந்தையில் தொடர்ந்து எதிரொலித்து வருகிறது. நேற்று மட்டும் தங்கம் பவுனுக்கு ரூ.2,240 உயர்ந்த நிலையில், இன்று மீண்டும் ரூ.2,160 உயர்ந்திருப்பது நகை வாங்க திட்டமிட்டுள்ளவர்களுக்கு கூடுதல் சுமையை ஏற்படுத்தியுள்ளது.
இன்றைய விலை நிலவரப்படி, 22 காரட் ஆபரணத் தங்கம் ஒரு கிராமுக்கு ரூ.270 உயர்ந்து ரூ.13,750-க்கும், ஒரு பவுன் ரூ.1,10,000-க்கும் விற்பனையாகிறது. 24 காரட் தங்கம் ஒரு கிராமுக்கு ரூ.294 உயர்ந்து ரூ.15,000-க்கும், 18 காரட் தங்கம் ஒரு கிராமுக்கு ரூ.270 உயர்ந்து ரூ.11,565-க்கும் விற்பனையாகிறது.
வெள்ளி விலையும் இன்று கணிசமாக உயர்ந்துள்ளது. ஒரு கிராம் வெள்ளி ரூ.10 உயர்ந்து ரூ.250-க்கும், கட்டி வெள்ளி ஒரு கிலோ ரூ.10,000 உயர்ந்து ரூ.2,50,000-க்கும் விற்பனையாகி வருகிறது. தங்கம் மற்றும் வெள்ளி விலையின் இந்த தொடர் உயர்வு நகை வியாபாரிகள் மற்றும் முதலீட்டாளர்களின் கவனத்தை ஈர்த்துள்ளது.
