வந்தே மாதரம் பாடல் விவகாரம்: காங்கிரஸ் மன்னிப்பு கேட்க வேண்டும் என அமித் ஷா வலியுறுத்தல்
முன்னாள் பிரதமர் அடல் பிஹாரி வாஜ்பாயின் நினைவு தினத்தை முன்னிட்டு ராஜஸ்தான் மாநிலம் சித்தோர்கரில் நடைபெற்ற நிகழ்ச்சியில் மத்திய உள்துறை அமைச்சர் அமித் ஷா பங்கேற்றார். அப்போது வாஜ்பாயின் சிலையை அவர் திறந்து வைத்தார். நிகழ்ச்சியில் ராஜஸ்தான் முதல்வர் பஜன்லால் சர்மா உள்ளிட்டோர் கலந்து கொண்டனர்.
நிகழ்ச்சியில் பேசிய அமித் ஷா, டெல்லியில் உள்ள காங்கிரஸ் கட்சியின் தலைமையகமான இந்திரா பவனில் சனிக்கிழமை நடைபெற்ற சுதந்திர தின விழாவில் வந்தே மாதரம் பாடல் பாடப்பட்டபோது, காங்கிரஸ் மூத்த தலைவர் சோனியா காந்தி பாடலை நிறுத்துமாறு கட்சித் தலைவரிடம் சைகை காட்டியதாக குற்றம்சாட்டினார். இந்த சம்பவத்தை நாட்டு மக்கள் தொலைக்காட்சி மற்றும் சமூக வலைதளங்களில் பார்த்ததாகவும் அவர் தெரிவித்தார்.
வந்தே மாதரம் தேசியப் பாடலை பாதியில் நிறுத்துவது போன்ற செயலை யாரும் கனவில்கூட நினைத்துப் பார்க்க முடியாது என்று அமித் ஷா விமர்சித்தார். மேலும், 140 கோடி மக்களும் இந்த சம்பவத்தை கவனித்து வருவதாகக் கூறிய அவர், தேசியப் பாடலுக்கு ஏற்பட்டதாகக் கூறப்படும் அவமதிப்புக்காக காங்கிரஸ் கட்சியினர் வெட்கப்பட வேண்டும் என்றும், நாட்டு மக்களிடம் அக்கட்சி மன்னிப்பு கேட்க வேண்டும் என்றும் வலியுறுத்தினார்.
வாக்கு வங்கி அரசியல் காரணமாக காங்கிரஸ் வந்தே மாதரம் பாடலை மறந்துவிட்டதாகவும் அமித் ஷா குற்றம்சாட்டினார். நாட்டின் தேசிய உணர்வுடன் தொடர்புடைய பாடலுக்கு உரிய மரியாதை அளிக்கப்பட வேண்டும் என்றும், இந்த விவகாரத்தில் காங்கிரஸ் தனது நிலைப்பாட்டை விளக்க வேண்டும் என்றும் அவர் தெரிவித்தார்.
இதற்கிடையே, அமித் ஷா உள்ளிட்ட பாஜக தலைவர்களின் குற்றச்சாட்டை காங்கிரஸ் மறுத்துள்ளது. வந்தே மாதரம் பாடல் இசைக்கப்பட்டபோது சோனியா காந்தி அதனை நிறுத்துமாறு சைகை காட்டவில்லை என்றும், கட்சித் தலைவர் மல்லிகார்ஜுன கார்கேவுக்கு இருக்கை வழங்குமாறு அவர் சைகை காட்டியதாகவும் காங்கிரஸ் விளக்கம் அளித்துள்ளது. மேலும், அந்த நிகழ்ச்சியில் வந்தே மாதரத்தின் முழு வடிவமும் பாடப்பட்டதாகவும் அக்கட்சி தெரிவித்துள்ளது.
இந்த விவகாரம் தொடர்பாக பாஜக தரப்பில் சோனியா காந்தி மீது வழக்குப் பதிவு செய்யக் கோரி காவல்துறையில் மனு அளிக்கப்பட்டுள்ளதாகவும் தெரிவிக்கப்பட்டுள்ளது. இதனால், வந்தே மாதரம் பாடல் தொடர்பான இந்த விவகாரம் அரசியல் கட்சிகளுக்கு இடையே மேலும் சர்ச்சையை ஏற்படுத்தியுள்ளது.
