ராகுல் காந்தியின் செயல்பாடுகளை இளைஞர்களால் ஏற்க முடியாது: பாஜக தலைவர் நிதின் நபின்
எதிர்க்கட்சித் தலைவர் ராகுல் காந்தி செயல்படும் விதத்தை இளைஞர்களால் ஏற்றுக்கொள்ள முடியாது என்று தான் நம்புவதாக பாஜக தேசிய தலைவர் நிதின் நபின் தெரிவித்துள்ளார். இந்தியா-பாகிஸ்தான் பிரிவினையின்போது ஏற்பட்ட துயரங்களை நினைவுகூரும் வகையில், ஆகஸ்ட் 14-ம் தேதி அனுசரிக்கப்படும் பிரிவினை துயரத்தின் நினைவு நாளையொட்டி டெல்லி அருகே குருகிராமில் நடைபெற்ற நிகழ்ச்சியில் அவர் பேசினார்.
அப்போது பேசிய நிதின் நபின், எந்தத் தவறும் செய்யாமல் உயிரிழந்தவர்களின் தியாகத்தையும், அவர்களுடன் தொடர்புடைய நினைவுகளையும் போற்றும் நாளாக பிரிவினை துயரத்தின் நினைவு நாள் அனுசரிக்கப்படுவதாக கூறினார். 1940-ம் ஆண்டு லாகூர் தீர்மானத்தில் இரு தேசக் கோட்பாடு குறித்து விவாதங்கள் நடைபெற்ற காலகட்டத்திலேயே, இந்தியாவுக்கு சுதந்திரம் கிடைக்கும்போது அதற்கான விலையை நாட்டின் பிரிவினை மூலம் செலுத்த வேண்டிய சூழல் ஏற்படலாம் என்பதை மக்கள் உணரத் தொடங்கியதாக அவர் குறிப்பிட்டார்.
அதிகாரம் மற்றும் வளமான எதிர்காலத்தை கனவு கண்டவர்கள் அதிகாரத்தை கைப்பற்றிய நிலையில், சுதந்திரத்துக்காக போராடிய மக்கள் பிரிவினையின் போது ரத்தக்களரியை எதிர்கொண்டதாக நிதின் நபின் தெரிவித்தார். பல குடும்பங்கள் தங்களது அன்புக்குரியவர்களை இழந்ததுடன், அந்த வலி இன்றும் மக்களின் மனதில் நீடித்து வருவதாகவும் அவர் கூறினார். அந்த காலகட்டத்தில் துயரத்தை நேரடியாக அனுபவித்த குடும்பங்களின் நிலையை நினைத்துப் பார்க்கும்போது, அத்தகைய கடினமான சூழலை இன்றைய தலைமுறையினர் அனுபவித்திருக்க வாய்ப்பில்லை என்றும் அவர் தெரிவித்தார்.
1946-ம் ஆண்டு ஆகஸ்ட் 16-ம் தேதி நடைபெற்ற நேரடி நடவடிக்கை நாளின்போது கொல்கத்தா வீதிகள் ரத்தக்களரியாக மாறியதாகவும், அதன் தொடர்ச்சியாக நாடு முழுவதும் மதக்கலவரங்கள் பரவியதாகவும் அவர் கூறினார். நாட்டின் பிரிவினையை அதிகாரத்தை அடைவதற்கான வாய்ப்பாக பார்த்தவர்கள், கோடிக்கணக்கான மக்களின் எதிர்காலத்தை பாதித்ததுடன் தங்களது அரசியல் எதிர்காலத்தையும் உறுதி செய்துகொண்டதாக நிதின் நபின் விமர்சித்தார்.
நேரு குடும்பத்தினர் அதிகாரத்திற்காகவே நாட்டை பிளவுபடுத்தியதாக குற்றம்சாட்டிய அவர், அப்போது நாட்டை பிரித்தவர்கள் தற்போது சமூகத்தை பிரிக்கும் செயல்களில் ஈடுபட்டு வருவதாகவும் விமர்சித்தார். பிரிவினையின் வலியை அனுபவித்த குடும்பங்களிடம் காங்கிரஸ் பகிரங்கமாக மன்னிப்பு கோரியுள்ளதா என்றும் அவர் கேள்வி எழுப்பினார். அவ்வாறு மன்னிப்பு கேட்டால் தங்களது உண்மையான முகம் வெளிப்பட்டுவிடும் என்பதால் காங்கிரஸ் அதனை செய்யவில்லை என்றும் அவர் கூறினார்.
பிரிவினை காலத்தில் லட்சக்கணக்கான மக்கள் தங்களது வாழ்நாள் சேமிப்புகளையும் சொத்துகளையும் விட்டுவிட்டு பாதுகாப்பான வாழ்க்கையை தேடி ஒரு இடத்திலிருந்து மற்றொரு இடத்துக்கு இடம்பெயர்ந்ததாக நிதின் நபின் தெரிவித்தார். புதிய இடங்களில் எங்கு தங்குவது, எவ்வாறு வாழ்க்கையை நடத்துவது, வேலை எங்கே கிடைக்கும் என்பதுகூட தெரியாத நிலையில் அவர்கள் அகதிகளாகச் சென்றதாக அவர் குறிப்பிட்டார். கொல்கத்தாவில் மகாத்மா காந்தி அமைதிப் பேரணி நடத்தியதையும், ராவல்பிண்டி முதல் பஞ்சாபின் பல்வேறு பகுதிகள் வரை மக்கள் வன்முறையை எதிர்கொண்டதையும் அவர் நினைவுகூர்ந்தார்.
இந்தியப் பிரிவினையின் துயரத்தை இன்றைய இளம் தலைமுறையினர் தெரிந்துகொள்ள வேண்டும் என்றும் அவர் வலியுறுத்தினார். ஒன்றரை கோடிக்கும் அதிகமான மக்கள் இடம்பெயர்ந்ததுடன், லட்சக்கணக்கானோர் உயிரிழந்ததாகவும் அவர் தெரிவித்தார். பிரிவினையின் துயரத்தை நினைவு நாளாக அனுசரிக்க பிரதமர் நரேந்திர மோடி முடிவு செய்ததன் நோக்கம், அந்த இருண்ட வரலாற்றை எதிர்கால தலைமுறையினர் மறந்துவிடாமல் இருப்பதே என்றும் அவர் கூறினார்.
தங்களது வரலாற்றை அறிந்து, புரிந்துகொண்டு, அதில் பெருமை கொள்ளாத எந்த தேசமும் சிறப்பான எதிர்காலத்தை உருவாக்க முடியாது என்றும் நிதின் நபின் தெரிவித்தார். நேரு-காந்தி குடும்பத்தினர் தங்களது கட்சியை அதிகாரத்தை மையமாகக் கொண்டே உருவாக்கியதாகவும், நாட்டின் பிரிவினைக்கான காரணமும் அதிகாரமே என்றும் அவர் குற்றம்சாட்டினார். இன்றும் அவர்களது அரசியல் அணுகுமுறையிலும் கொள்கைகளிலும் மாற்றம் ஏற்படவில்லை எனவும் அவர் விமர்சித்தார்.
எதிர்க்கட்சித் தலைவர் ராகுல் காந்தியின் செயல்பாடுகளை இளைஞர்களால் ஏற்றுக்கொள்ள முடியாது என்று தான் கருதுவதாகவும் நிதின் நபின் தெரிவித்தார். இந்தியாவின் ராஜதந்திர நிலைப்பாடு மற்றும் சர்வதேச அளவில் இந்தியா ஏற்படுத்தி வரும் தாக்கத்தை உலக நாடுகள் கவனித்து வருவதாகவும், நாட்டின் வளர்ச்சி மற்றும் முன்னேற்றத்தை மக்கள் அங்கீகரித்து வருவதாகவும் அவர் கூறினார்.
சமீபத்திய நாடாளுமன்றக் கூட்டத்தொடரில் எதிர்க்கட்சியை வழிநடத்திய காங்கிரஸ் தலைவர்களின் செயல்பாடுகளை தான் கவனித்ததாகவும் நிதின் நபின் தெரிவித்தார். இந்தியப் பிரிவினையின் கொடூரங்களையும் வலியையும் நாட்டின் மீது ஏற்படுத்தியவர்கள் தற்போது இந்திய ஒற்றுமை குறித்து பேசுவதாகவும் அவர் விமர்சித்தார். இந்தியாவை துண்டு துண்டாக பிரிக்க வேண்டும் என்று முழக்கமிடுபவர்களை வரவேற்பவர்களிடம் நாட்டை ஒன்றிணைத்து முன்னேற்றப் பாதையில் அழைத்துச் செல்லும் எண்ணம் ஒருபோதும் இருக்க முடியாது என்றும் அவர் கூறினார்.
