தொகுதி மறுவரையறை மசோதா தென் மாநிலங்களின் அதிகாரத்தைப் பறிக்கும்: மாணிக்கம் தாகூர் விளக்கம்

தொகுதி மறுவரையறை சட்ட மசோதா நிறைவேற்றப்பட்டால் தமிழ்நாடு உள்ளிட்ட தென் மாநிலங்களின் அரசியல் அதிகாரம் பாதிக்கப்படும் என்றும், மாநில சுயாட்சி, ஜனநாயகம், சமூக நீதி, சமத்துவம் மற்றும் மதச்சார்பின்மை உள்ளிட்ட அரசியலமைப்பின் அடிப்படை நோக்கங்களுக்கு பாதிப்பு ஏற்படும் என்றும் தமிழ்நாடு காங்கிரஸ் கமிட்டி தலைவர் மாணிக்கம் தாகூர் தெரிவித்துள்ளார்.

இதுதொடர்பாக அவர் வெளியிட்டுள்ள அறிக்கையில், மக்களவை உறுப்பினர்களின் தற்போதைய எண்ணிக்கையான 543-ஐ நிரந்தரமாகத் தொடர வேண்டும் என்றும், அதே தொகுதிகளின் அடிப்படையில் பெண்களுக்கான 33 சதவீத இடஒதுக்கீட்டை 2029-ம் ஆண்டு மக்களவைத் தேர்தலில் நடைமுறைப்படுத்த வேண்டும் என்ற தமிழக முதல்வர் கொண்டு வந்த அரசின் தனித் தீர்மானத்தை காங்கிரஸ் சார்பில் வரவேற்பதாகவும் தெரிவித்துள்ளார்.

கடந்த ஏப்ரல் மாதம் நடைபெற்ற நாடாளுமன்ற சிறப்புக் கூட்டத்தில் தோற்கடிக்கப்பட்டதாக கூறப்படும் தொகுதி மறுவரையறை மசோதாவை, தற்போதைய நாடாளுமன்றக் கூட்டத்தொடரில் மீண்டும் கொண்டு வர ஒன்றிய பாஜக அரசு திட்டமிட்டு வருவதாக மாணிக்கம் தாகூர் குற்றம்சாட்டியுள்ளார். இந்த மசோதா சட்டமாக்கப்பட்டால் மாநிலங்களுக்கு இடையிலான மக்களவைத் தொகுதிகளின் எண்ணிக்கை வித்தியாசம் மேலும் பல மடங்கு அதிகரிக்கும் என்றும் அவர் தெரிவித்துள்ளார்.

மக்கள்தொகை கட்டுப்பாட்டை வெற்றிகரமாக செயல்படுத்திய மாநிலங்களின் அரசியல் பிரதிநிதித்துவம் பாதிக்கப்படக் கூடாது என்பதற்காகவே கடந்த காலங்களில் தொகுதி எண்ணிக்கையை நிலைநிறுத்தும் நடவடிக்கைகள் மேற்கொள்ளப்பட்டதாகவும் அவர் குறிப்பிட்டுள்ளார். 1971-ம் ஆண்டு மக்கள்தொகை அடிப்படையில் தற்போதுள்ள 543 மக்களவைத் தொகுதிகளைத் தொடரும் வகையில், அப்போது பிரதமராக இருந்த இந்திரா காந்தி 1976-ம் ஆண்டு அரசமைப்புச் சட்டத் திருத்தத்தை கொண்டு வந்து, அந்த நிலையை 2001-ம் ஆண்டு வரை நீட்டித்ததாகவும் தெரிவித்துள்ளார்.

அதன்பின்னர், 2001-ம் ஆண்டு பிரதமராக இருந்த ஏ.பி. வாஜ்பாய், இதே நிலையை மேலும் 25 ஆண்டுகளுக்கு, அதாவது 2026-ம் ஆண்டு வரை நீட்டித்ததாகவும் மாணிக்கம் தாகூர் கூறியுள்ளார். ஆனால், தற்போதைய நரேந்திர மோடி அரசு மக்கள்தொகை அதிகரிப்புக்கு ஏற்ப மக்களவைத் தொகுதிகளின் எண்ணிக்கையை உயர்த்தும் நோக்கத்தில் செயல்படுவதாகவும், அது நடைமுறைக்கு வந்தால் மாநிலங்களுக்கு இடையிலான வேறுபாடு அதிகரித்து சமநிலை பாதிக்கப்படும் என்றும் அவர் தெரிவித்துள்ளார்.

தொகுதி மறுவரையறை மசோதா அமலுக்கு வந்தால், ஒன்றிய அரசின் குடும்பக் கட்டுப்பாட்டுத் திட்டங்களை சிறப்பாக செயல்படுத்தி மக்கள்தொகை வளர்ச்சியை கட்டுப்படுத்திய தமிழ்நாடு போன்ற தென் மாநிலங்களுக்கு தண்டனை வழங்குவது போன்ற நிலையும், மக்கள்தொகை கட்டுப்பாட்டில் போதிய முன்னேற்றம் காணாத வட மாநிலங்களுக்கு கூடுதல் பிரதிநிதித்துவம் வழங்குவது போன்ற சூழலும் உருவாகும் என மாணிக்கம் தாகூர் தெரிவித்துள்ளார்.

மேலும், உத்தரப் பிரதேசத்துக்கும் தமிழ்நாட்டுக்கும் இடையிலான மக்களவைத் தொகுதிகளின் எண்ணிக்கை வித்தியாசம் 41-ல் இருந்து 62 ஆக அதிகரிக்கும் என அவர் குறிப்பிட்டுள்ளார். மக்களவை உறுப்பினர்களின் எண்ணிக்கை பெருமளவில் அதிகரித்தால், மாநிலங்களவையின் முக்கியத்துவம் குறையும் என்றும் அவர் கூறியுள்ளார்.

மக்களவையில் 815 உறுப்பினர்கள் இடம்பெறும் சூழல் ஏற்பட்டால், பெரும்பாலான உறுப்பினர்களுக்கு அவையில் பேசுவதற்கான வாய்ப்பு கிடைப்பதில் சிக்கல் ஏற்படும் என்றும், தனிப்பட்ட நாடாளுமன்ற உறுப்பினரின் முக்கியத்துவம் குறையும் என்றும் மாணிக்கம் தாகூர் தெரிவித்துள்ளார். இதன் காரணமாக “ஒரு எம்.பி., ஒரு வாக்கு” என்ற கொள்கையின் முக்கியத்துவமே பாதிக்கப்படும் என்றும் அவர் கூறியுள்ளார்.

ஒட்டுமொத்தமாக, தொகுதி மறுவரையறை சட்ட மசோதா தமிழ்நாடு உள்ளிட்ட தென் மாநிலங்களின் அரசியல் அதிகாரத்தைப் பறிக்கும் நடவடிக்கையாக அமையும் என்றும், இது மாநில சுயாட்சி, ஜனநாயகம், சமூக நீதி, சமத்துவம் மற்றும் மதச்சார்பின்மை உள்ளிட்ட இந்திய அரசியலமைப்பின் உயரிய நோக்கங்களுக்கு பாதிப்பை ஏற்படுத்தும் என்றும் மாணிக்கம் தாகூர் தெரிவித்துள்ளார்.

மேலும், தமிழகத்தைச் சேர்ந்த எந்த அரசியல் கட்சியாவது இந்த மசோதா நிறைவேறுவதற்கு நேரடியாகவோ அல்லது மறைமுகமாகவோ உதவினால், அது தமிழ்நாட்டுக்கு இழைக்கப்படும் அநீதி மற்றும் துரோகமாகவே கருதப்படும் என்றும் அவர் தெரிவித்துள்ளார். அத்தகைய கட்சிகளை தமிழக மக்கள் ஒருபோதும் மன்னிக்க மாட்டார்கள் என்றும் அவர் எச்சரித்துள்ளார்.

தமிழகத்தின் உரிமைகளையும் இந்திய அரசியலமைப்பையும் அடகுவைத்து ஒன்றிய பாஜக அரசுக்கு ஆதரவளிக்கும் எவரும் வரலாற்றுப் பிழையிலிருந்து தப்ப முடியாது என்றும் மாணிக்கம் தாகூர் தெரிவித்துள்ளார். தமிழகத்தின் குரலாகவும், மக்களாட்சியின் பாதுகாவலராகவும் தொகுதி மறுவரையறை விவகாரத்தில் இறுதிவரை காங்கிரஸ் களத்தில் நிற்கும் என்றும் அவர் உறுதியளித்துள்ளார்.