செங்கல்பட்டு கன்னிவாக்கத்தில் சட்டவிரோதமாக தங்கியிருந்த 3 வங்கதேசத்தினர் பிடிப்பு: சிஐடி அதிரடி
செங்கல்பட்டு மாவட்டம் கூடுவாஞ்சேரி காவல் நிலைய எல்லைக்குட்பட்ட கன்னிவாக்கம் தர்காஸ் சாலையில், உரிய ஆவணங்களின்றி சட்டவிரோதமாகத் தங்கியிருந்த மூன்று வங்கதேசத்தினரைக் க்யூ பிராஞ்ச் சிஐடி போலீஸார் அதிரடியாகப் பிடித்துள்ளனர். மாவட்டப் பாதுகாப்பு மற்றும் கண்காணிப்பு நடவடிக்கைகளின் போது இவர்கள் சிக்கியதாகக் காவல் துறைத் தரப்பில் தெரிவிக்கப்பட்டுள்ளது.
பிடிபட்டவர்கள் வங்கதேசத்தின் மோரேல்கஞ்ச் காவல் நிலைய எல்லைக்குட்பட்ட பகுதிகளைச் சேர்ந்த ஜாகிர் பக்கீர், அப்துல் சலாம் சித்தாரி (71) மற்றும் ஆரிப் சித்தாரி (22) என அடையாளம் காணப்பட்டுள்ளனர். இவர்களைப் பிடித்த போலீஸார், உரிய விசாரணைக்காக உடனடியாகக் கூடுவாஞ்சேரி காவல் நிலையத்திற்கு அழைத்துச் சென்றனர்.
செங்கல்பட்டு மாவட்ட க்யூ பிராஞ்ச் சிஐடி ஆய்வாளர் நித்யா தலைமையிலான போலீஸ் குழுவினர், பிடிபட்ட நபர்களிடம் தீவிர விசாரணை நடத்தினர். அவர்கள் இந்தியாவில் தங்கியிருப்பதற்காக வைத்திருந்த ஆவணங்கள் மற்றும் பிற விவரங்கள் அனைத்தும் முழுமையாக ஆய்வு செய்யப்பட்டன. முதற்கட்ட விசாரணைக்குப் பின்னர், உரிய சட்ட நடைமுறைகளைப் பின்பற்றி அவர்கள் மூவரும் சேலத்தில் உள்ள வங்கதேச அகதிகள் முகாமில் பாதுகாப்பாக ஒப்படைக்கப்பட்டனர்.
இருப்பினும், இந்த நபர்கள் எந்த சூழ்நிலையில் எல்லை தாண்டி தமிழ்நாட்டிற்குள் நுழைந்தனர், எவ்வளவு காலமாக இந்த பகுதியில் தங்கியிருந்தனர், மற்றும் இவர்களுக்கு வேறு ஏதேனும் சட்டவிரோத கும்பல்களுடன் தொடர்பு உள்ளதா என்பது போன்ற பல்வேறு கோணங்களில் க்யூ பிராஞ்ச் சிஐடி போலீஸார் தொடர்ந்து தீவிரமாக விசாரணை நடத்தி வருகின்றனர்.
