லஞ்சம் கேட்ட போக்குவரத்து எஸ்.ஐ. ஆயுதப்படைக்கு மாற்றம்: ஊழல் ஒழிப்பு பிரிவின் முதல் நடவடிக்கை
சென்னை காவல் துறையில் லஞ்சம் கேட்டதாகப் பெறப்பட்ட புகாரின் அடிப்படையில் போக்குவரத்து போலீஸ் எஸ்.ஐ. ஒருவர் ஆயுதப்படைக்கு மாற்றப்பட்டுள்ளார். புதிதாக தொடங்கப்பட்ட சென்னை காவல் ஊழல் ஒழிப்பு தனிப்பிரிவின் முதல் நடவடிக்கையாக இந்த சம்பவம் அமைந்துள்ளது.
சென்னை காவல் துறையில் பணியாற்றும் போலீஸார் லஞ்சம் கேட்பது தொடர்பாக பொதுமக்கள் நேரடியாக புகார் அளிக்கும் வகையில், காவல் ஆணையர் அமல்ராஜ் உத்தரவின்பேரில் கடந்த வாரம் ‘ஊழல் ஒழிப்பு தனிப்பிரிவு’ தொடங்கப்பட்டது. இதற்காக 7871723000 என்ற தனிப்பிரிவு வாட்ஸ்அப் எண்ணும் அறிவிக்கப்பட்டது. போலீஸார் லஞ்சம் கேட்பது தொடர்பான புகார்கள் மற்றும் அதற்கான ஆதாரங்களை இந்த எண்ணுக்கு அனுப்பலாம் என்றும், புகார் அளிப்பவர்களின் விவரங்கள் ரகசியமாக பாதுகாக்கப்படும் என்றும் காவல் ஆணையர் தெரிவித்திருந்தார்.
இந்த புதிய முயற்சிக்கு பொதுமக்களிடையே வரவேற்பு கிடைத்த நிலையில், ஊழல் ஒழிப்பு தனிப்பிரிவு தொடங்கப்பட்டதைத் தொடர்ந்து காவல் துறை அதிகாரிகள் மற்றும் போலீஸாருக்கு காவல் ஆணையர் அமல்ராஜ் முக்கிய அறிவுறுத்தல்களை வழங்கியிருந்தார். எந்தச் சூழலிலும் தான் லஞ்சம் வாங்க மாட்டேன் என்றும், காவல் துறையில் யார் லஞ்சம் வாங்கினாலும் அவர்களைத் தப்ப விடமாட்டேன் என்றும் அவர் எச்சரித்திருந்தார்.
இந்நிலையில், புதிய தனிப்பிரிவுக்கு கிடைத்த புகாரின் அடிப்படையில் போக்குவரத்து போலீஸ் எஸ்.ஐ. மீது நடவடிக்கை எடுக்கப்பட்டுள்ளது. சிந்தாதிரிப்பேட்டை பகுதியில் போக்குவரத்துக்கு இடையூறாக சாலையோரத்தில் நிறுத்தப்பட்டிருந்த வாகனம் ஒன்றை போக்குவரத்து போலீஸார் பறிமுதல் செய்தனர். அந்த வாகனத்தை மீண்டும் விடுவிப்பதற்காக எஸ்.ஐ. செல்வராஜ், வாகன உரிமையாளரிடம் ரூ.500 லஞ்சம் கேட்டதாக கூறப்படுகிறது.
இதையடுத்து வாகன உரிமையாளர், சென்னை காவல் துறையின் ஊழல் ஒழிப்பு தனிப்பிரிவுக்கான வாட்ஸ்அப் எண்ணில் புகார் அளித்தார். புகாரைத் தொடர்ந்து காவல் துறை அதிகாரிகள் விசாரணை மேற்கொண்டனர். விசாரணையில், வாகனத்தை விடுவிப்பதற்காக ரூ.500 லஞ்சம் கேட்டது உறுதி செய்யப்பட்டதாக தெரிவிக்கப்பட்டுள்ளது.
இதனைத் தொடர்ந்து எஸ்.ஐ. செல்வராஜை ஆயுதப்படைக்கு மாற்றி காவல் ஆணையர் அமல்ராஜ் உத்தரவிட்டார். புதிதாக தொடங்கப்பட்ட ஊழல் ஒழிப்பு தனிப்பிரிவுக்கு கிடைத்த முதல் புகாரிலேயே போலீஸ் அதிகாரி மீது நடவடிக்கை எடுக்கப்பட்டிருப்பது, லஞ்சப் புகார்களுக்கு உடனடியாக நடவடிக்கை எடுக்கப்படும் என்ற சென்னை காவல் துறையின் நிலைப்பாட்டை வெளிப்படுத்துவதாக அமைந்துள்ளது.
