கோடநாடு கொலை கொள்ளை வழக்கு: நீதிமன்ற விசாரணை செப்டம்பர் 16-ம் தேதிக்கு ஒத்திவைப்பு
நீலகிரி மாவட்டம் கோடநாடு பகுதியில் உள்ள தேயிலை எஸ்டேட்டில் கடந்த 2017-ம் ஆண்டு ஏப்ரல் 23-ம் தேதி கொலை மற்றும் கொள்ளை சம்பவம் நடைபெற்றது. அப்போது எஸ்டேட் பங்களாவில் பாதுகாப்புப் பணியில் இருந்த காவலாளி கொலை செய்யப்பட்டதுடன், அங்கிருந்த சில முக்கிய ஆவணங்களும் கொள்ளையடிக்கப்பட்டதாக தெரிவிக்கப்பட்டது.
இந்த சம்பவம் தொடர்பாக போலீஸார் விசாரணை நடத்தி, சயான் உள்ளிட்ட 10 பேரை கைது செய்தனர். இதுதொடர்பான வழக்கு ஊட்டியில் உள்ள ஒருங்கிணைந்த நீதிமன்றத்தில் தொடர்ந்து விசாரணை நடைபெற்று வருகிறது.
இந்நிலையில், இந்த வழக்கு நேற்று மீண்டும் விசாரணைக்கு வந்தது. அப்போது சிபிசிஐடி ஏடிஎஸ்பி முருகவேல் தலைமையிலான சிபிசிஐடி போலீஸார் நீதிமன்றத்தில் ஆஜராகினர். குற்றம்சாட்டப்பட்டவர்களின் தரப்பில் சயான் மற்றும் உதயகுமார் ஆகியோரும் ஆஜராகினர்.
விசாரணையின்போது, வழக்கின் தற்போதைய நிலை குறித்து நீதிபதி முரளிதரன் கேட்டறிந்தார். இதற்கு அரசு தரப்பு வழக்கறிஞர் காமேஸ்வரன், வழக்கின் விசாரணை தொடர்பான தற்போதைய நிலவரத்தை நீதிபதியிடம் விளக்கினார்.
இதையடுத்து, வழக்கின் அடுத்தகட்ட விசாரணையை வரும் செப்டம்பர் 16-ம் தேதிக்கு ஒத்திவைத்து நீதிபதி முரளிதரன் உத்தரவிட்டார். இதனால் கோடநாடு கொலை, கொள்ளை வழக்கின் விசாரணை தொடர்ந்து நடைபெற உள்ளது.
