சேத்துப்பட்டில் உள்ள உயிரி-எரிவாயு ஆலையை முதல்வர் விஜய் நேரில் பார்வையிட்டு ஆய்வு செய்தார்
சென்னை சேத்துப்பட்டில் பொது-தனியார் பங்களிப்புடன் செயல்பட்டு வரும் உயிரி-எரிவாயு ஆலையை முதல்வர் விஜய் நேரில் பார்வையிட்டு ஆய்வு செய்தார். தலைநகர் சென்னையில் நாள்தோறும் சேரும் கழிவுகளை நவீன தொழில்நுட்பத்தின் மூலம் பயனுள்ள எரிபொருளாக மாற்றும் பணிகளை அவர் கேட்டறிந்தார்.
சென்னையில் தினமும் சேரும் குப்பைகளில் 3,200 மெட்ரிக் டன் மக்கும் குப்பைகளாகவும், 2,950 மெட்ரிக் டன் மக்காத குப்பைகளாகவும் உள்ளன. இதில் மக்கும் குப்பைகளை இயற்கை எரிவாயு மற்றும் உரமாகவும், மக்காத பிளாஸ்டிக் கழிவுகளைத் தார்ச்சாலை மற்றும் சிமெண்ட் ஆலைகளுக்கு எரிபொருளாகவும் மாற்ற முதல்வர் உத்தரவிட்டார்.
தற்போது செயல்பட்டு வரும் சேத்துப்பட்டு ஆலை தினசரி 140 மெட்ரிக் டன் ஈரக்கழிவுகளைச் செயலாக்கி, 4,900 கிலோ எரிவாயுவை உற்பத்தி செய்யும் திறன் கொண்டதாகும். இதேபோல் மாதவரத்திலும் ஓர் ஆலை இயங்கி வரும் நிலையில், மாநகர உள்கட்டமைப்பை வலுப்படுத்த மேலும் 5 ஆலைகள் நிறுவப்பட்டு வருகின்றன.
இத்தகைய நவீன கழிவு மேலாண்மைப் பணிகளைச் சென்னையில் மட்டுமின்றி, தமிழகத்தின் அனைத்து நகர்ப்புற உள்ளாட்சிகளிலும் குறிப்பிட்ட காலக்கெடுவுக்குள் அறிவியல் பூர்வமாகச் செயல்படுத்த வேண்டும் என்று அதிகாரிகளுக்கு முதல்வர் விஜய் உத்தரவிட்டுள்ளார்.
