“தூய்மைப் பணியாளர்களின் ஊதியத்தில் மோசடி செய்வது மிகப்பெரிய குற்றம்” – அன்புமணி
பாமக தலைவர் அன்புமணி ராமதாஸ்,
“சமூகத்தின் அடித்தட்டு மக்களாகிய தூய்மைப் பணியாளர்களின் மாதச் சம்பளத்தில் மோசடி செய்வதை மன்னிக்க முடியாது. அவர்களிடம் திமுக அரசு காட்டும் துரோகம் வரவிருக்கும் தேர்தலில் கண்டிப்பாக தண்டனைக்குள்ளாகும்” என்று தெரிவித்துள்ளார்.
சென்னையில் தனியார் நிறுவனத்திடம் ஒப்படைக்கப்பட்ட ராயபுரம், திருவிக நகர் மண்டலங்களில் தூய்மைப் பணி செய்யும் பணியாளர்களுக்கு மாதம் ரூ.23,000 வழங்கப்படும் என்று மாநகராட்சி அதிகாரிகள் மற்றும் திமுக உறுப்பினர்கள் உறுதி அளித்திருந்தனர். ஆனால், கையெழுத்திடப்பட்ட ஒப்பந்தத்தில் மாத ஊதியம் ரூ.16,950 மட்டுமே என குறிப்பிடப்பட்டிருப்பது பெரும் அதிர்ச்சியை ஏற்படுத்தியுள்ளது.
தூய்மைப் பணியாளர்களின் அறியாமையைப் பயன்படுத்தி அவர்களை ஏமாற்றியிருப்பது கண்டிக்கத்தக்கது என அன்புமணி சுட்டிக்காட்டியுள்ளார். சென்னை மாநகராட்சியின் இரண்டு மண்டலங்களில் குப்பை அகற்றும் பணி, ரூ.2,300 கோடி மதிப்பில் சென்னை என்விரோ சொல்யூஷன்ஸ் பிரைவேட் லிமிடெட் என்ற தனியார் நிறுவனத்துக்கு ஒப்படைக்கப்பட்டதை அவர் குறிப்பிட்டுள்ளார்.
இதனால் நிரந்தர ஊழியர்கள் அம்பத்தூர் மண்டலத்திற்கு மாற்றப்பட்டு, தற்காலிக பணியாளர்கள் பணி நீக்கம் செய்யப்பட்டனர். முன்னதாக அவர்கள் ரூ.22,590 சம்பளம் பெற்றிருந்த நிலையில், புதிய ஒப்பந்தத்தில் ரூ.16,950 மட்டுமே வழங்கப்படும் என நிர்ணயிக்கப்பட்டது. இதை எதிர்த்து தூய்மைப் பணியாளர்கள் போராட்டம் நடத்தினர்.
உயர் நீதிமன்றம் கடந்த ஆகஸ்ட் 20-ம் தேதி, பணியாளர்களுக்கு குறைந்தபட்சம் ரூ.23,000 சம்பளம் வழங்க வேண்டும் என உத்தரவிட்டது. அதன் பின்னர் ஆகஸ்ட் 24-ம் தேதி மாநகராட்சி அதிகாரிகள், “இன்றைக்கே ஒப்பந்தத்தில் கையெழுத்திட்டால் மாதம் ரூ.23,000 வழங்கப்படும்; வேலை நிறுத்த நாட்களுக்கும் ஊதியம் தரப்படும்” என்று சொல்லி நூற்றுக்கணக்கான பணியாளர்களை கையெழுத்திடச் செய்தனர்.
ஆனால் வீடு திரும்பி பார்த்தபோது, அதில் மாத ஊதியம் ரூ.16,950 எனவும், நிறுவனம் எப்போது வேண்டுமானாலும் ஒரு மாதச் சம்பளம் மட்டும் கொடுத்து பணி நீக்கம் செய்யலாம் என்றும் குறிப்பிடப்பட்டிருப்பது தெரியவந்தது. பணியாளர்களின் கல்வியறிவின்மையை பயன்படுத்தி இப்படியான மோசடியில் ஈடுபட்டுள்ளதாக அன்புமணி குற்றம்சாட்டியுள்ளார்.
“தூய்மைப் பணியாளர்களின் சம்பளத்தில் மூன்றில் ஒரு பங்கை வெட்டி எடுப்பது கடுமையான குற்றம். இதற்கு திமுக அரசு துணைபோய் இருப்பது மக்களுக்கு துரோகம். தங்களைத் தேர்ந்தெடுத்த மக்களை ஏமாற்றிய அரசை மக்கள் அடுத்த தேர்தலில் கண்டிப்பாக தண்டிப்பார்கள்” என்று அன்புமணி ராமதாஸ் வலியுறுத்தியுள்ளார்.
