நீட் விவகாரத்தில் மாணவர்கள் மீது தடியடி: பிரதமர் மோடி நிபந்தனையற்ற மன்னிப்பு கோர ராகுல் காந்தி வலியுறுத்தல்!
புதுடெல்லி: நீட் தேர்வு வினாத்தாள் கசிவு விவகாரத்தைக் கண்டித்து டெல்லியில் அமைதியான முறையில் போராட்டம் நடத்திய மாணவர்கள் மீது காவல்துறையினர் மற்றும் பாதுகாப்புப் படையினர் நடத்திய தடியடி சம்பவத்திற்குப் பிரதமர் மோடி பகிரங்க மன்னிப்பு கோர வேண்டும் என மக்களவை எதிர்க்கட்சித் தலைவர் ராகுல் காந்தி வலியுறுத்தியுள்ளார். கடந்த திங்கள்கிழமை நடைபெற்ற இப்போராட்டத்தில் மாணவர்கள் தாக்கப்பட்டதைக் கண்டித்து ஆர்ப்பாட்டத்தில் ஈடுபட்ட ராகுல் காந்தி உள்ளிட்ட தலைவர்கள் கைது செய்யப்பட்டு பின்னர் விடுவிக்கப்பட்ட நிலையில், டெல்லி காங்கிரஸ் தலைமையகத்தில் செய்தியாளர்களைச் சந்தித்துப் பேசினார்.
அப்போது அவர், “கடந்த 10 ஆண்டுகளில் நமது நாட்டின் கல்வி முறை முற்றிலும் சீரழிந்துவிட்டது. பல்வேறு போட்டித் தேர்வுகளில் 152 முறை வினாத்தாள் கசிந்தும் சம்பந்தப்பட்ட குற்றவாளிகள் யாரும் இதுவரை தண்டிக்கப்படவில்லை. இத்தகைய மோசடிகளால் இளைஞர்களின் எதிர்காலம் கேள்விக்குறியாகியுள்ளது. நீட் வினாத்தாள் கசிவு காரணமாக மீண்டும் தேர்வு எழுத வேண்டிய கட்டாயத்திற்குத் தள்ளப்படும் மாணவர்கள் கடும் மன அழுத்தத்திற்கு உள்ளாகின்றனர்” என்று தனது கவலையைத் தெரிவித்தார்.
மேலும், போராட்டத்தை முடிக்க மாணவர்கள் முன்வைக்கும் 3 முக்கிய கோரிக்கைகளை மத்திய அரசு ஏற்க வேண்டும் எனக் குறிப்பிட்ட ராகுல் காந்தி, “மத்திய கல்வி அமைச்சர் தர்மேந்திர பிரதானை உடனடியாகப் பதவி நீக்கம் செய்ய வேண்டும்; மாணவர்கள் மீது தாக்குதல் நடத்திய காவல்துறையினர் மீது உரிய நடவடிக்கை எடுக்கப்பட வேண்டும்; இந்த ஒட்டுமொத்த சம்பவத்திற்கும் பொறுப்பேற்றுப் பிரதமர் மோடி மாணவர்களிடம் மன்னிப்பு கேட்க வேண்டும்” எனக் வலியுறுத்தினார். தேசிய ஜனநாயக கூட்டணி ஆட்சியில் சிதைக்கப்பட்டுள்ள கல்வி முறையை ஏழை மற்றும் நடுத்தர மக்களுக்கானதாக மாற்ற வேண்டும் என்றும் அவர் கேட்டுக்கொண்டார்.
இதனிடையே, நாடாளுமன்ற வளாகத்தில் செய்தியாளர்களிடம் பேசிய காங்கிரஸ் பொதுச்செயலாளர் பிரியங்கா காந்தி, “நாடாளுமன்றத்தில் எதிர்க்கட்சித் தலைவர்களையோ அல்லது பிற முக்கிய தலைவர்களையோ பேச விடுவதில்லை; நாட்டில் ஜனநாயகம் முடிவுக்கு வந்துவிட்டது. இளைஞர்களுக்கான முழு கல்வி பட்ஜெட் ரூ.1.4 லட்சம் கோடியாக உள்ள நிலையில், பெரும் தொழிலதிபர்களுக்கு ரூ.16 லட்சம் கோடி கடன்களை அரசு தள்ளுபடி செய்கிறது. எதிர்காலத்தைக் கட்டமைக்கக் கடுமையாகப் போராடும் மாணவர்களின் வாழ்க்கையை அரசு அழித்து வருகிறது” எனக் குற்றம் சாட்டினார்.
