“திமுக தோற்க வேண்டும், தமிழ்நாடு ஜெயிக்க வேண்டும்”: ஆந்திர முதல்வர் சந்திரபாபு நாயுடு புதிய முழக்கம்!
தமிழகச் சட்டமன்றத் தேர்தலில் தேசிய ஜனநாயகக் கூட்டணி வேட்பாளர்களை ஆதரித்து, ஆந்திர மாநில முதலமைச்சர் சந்திரபாபு நாயுடு சென்னையில் தீவிரப் பிரச்சாரம் மேற்கொண்டார். அமைந்தகரையில் நடைபெற்ற பொதுக்கூட்டத்தில் பேசிய அவர், “திமுக தோற்க வேண்டும், தமிழ்நாடு ஜெயிக்க வேண்டும்” எனத் தமிழில் முழக்கமிட்டுத் தனது உரையைத் தொடங்கினார்.
மக்களவையில் மகளிர் இடஒதுக்கீடு மசோதாவைத் தோற்கடித்ததற்காக திமுக மற்றும் காங்கிரஸ் கட்சிகள் பெண்களிடம் பகிரங்கமாக மன்னிப்பு கேட்க வேண்டும் என்று அவர் வலியுறுத்தினார். பிரதமர் மோடி கொண்டு வந்த இந்த இடஒதுக்கீடு, நாட்டின் முற்போக்கான வளர்ச்சிக்கு மிக முக்கியமானது என்று குறிப்பிட்ட அவர், காங்கிரஸ் மற்றும் திமுக போன்ற கட்சிகள் எப்போதும் சீர்திருத்தங்களுக்கு முட்டுக்கட்டையாகவே இருந்து வருவதாகக் குற்றஞ்சாட்டினார்.
தமிழகத்தில் உண்மையான மாற்றம் ஏற்படவும், மாநிலம் பொருளாதாரத்தில் முன்னேறவும் மக்கள் இரட்டை எஞ்சின் அரசாங்கத்தைத் தேர்ந்தெடுக்க வேண்டும் என்று கேட்டுக்கொண்டார். மேலும், திமுக கூட்டணி பெண்களை ஏமாற்றிவிட்டதாகச் சாடிய அவர், வரும் தேர்தலில் இந்தக் கூட்டணிக்கு மக்கள் தகுந்த பாடம் புகட்ட வேண்டும் என்றும் தமிழில் உரையாற்றி வாக்குச் சேகரித்தார்.
