ஆஸ்கார் விருது வென்ற முதல் ஐரிஷ் நடிகை பிரெண்டா ஃபிரிக்கர் காலமானார்: திரையுலகினர் சோகம்!
‘மை லெஃப்ட் ஃபுட்’, ‘ஹோம் அலோன் 2’ உள்ளிட்ட உலகப் புகழ்பெற்ற திரைப்படங்களின் மூலம் சர்வதேச அளவில் முத்திரை பதித்த அயர்லாந்தின் மூத்த நடிகை பிரெண்டா ஃபிரிக்கர் (Brenda Fricker), டப்ளினில் உள்ள அவரது இல்லத்தில் உடல்நலக்குறைவால் காலமானார். அவருக்கு வயது 81. அயர்லாந்து திரையுலக வரலாற்றிலேயே ஆஸ்கார் விருது வென்ற முதல் ஐரிஷ் கலைஞர் என்ற வரலாற்றுச் சிறப்புமிக்க பெருமையைப் பெற்றவர் பிரெண்டா என்பது குறிப்பிடத்தக்கது. அவரது மறைவை குடும்பத்தினர் அதிகாரப்பூர்வமாக உறுதிப்படுத்தியுள்ளனர்.
நாடகங்கள் மற்றும் தொலைக்காட்சித் தொடர்கள் மூலம் தனது கலைப்பயணத்தைத் தொடங்கிய பிரெண்டா, 1986-ம் ஆண்டு பிபிசி (BBC) தொலைக்காட்சியின் புகழ்பெற்ற ‘கேஷுவாலிட்டி’ தொடரில் செவிலியர் மேகன் ரோச் கதாபாத்திரத்தில் நடித்து ரசிகர்களின் மனதைக் கவர்ந்தார். இதன் தொடர்ச்சியாக, 1990-ஆம் ஆண்டு வெளியான ‘மை லெஃப்ட் ஃபுட்’ (My Left Foot) திரைப்படத்தில் நடிகர் டேனியல் டே-லூயிஸின் தாயாராக நடித்த பிரெண்டாவின் அசாத்திய நடிப்பு, உலக அளவில் பாராட்டுகளைப் பெற்றது. இக்கதாபாத்திரத்திற்காக, ஜூலியா ராபர்ட்ஸ் போன்ற முன்னணி ஹாலிவுட் நடிகைகளைப் பின்னுக்குத் தள்ளி, சிறந்த துணை நடிகைக்கான ஆஸ்கார் விருதை வென்று சாதனை படைத்தார்.
மேலும், 1992-ல் வெளியாகி உலகெங்கும் உள்ள குழந்தைகளைக் கவர்ந்த ‘ஹோம் அலோன் 2: லாஸ்ட் இன் நியூயார்க்’ திரைப்படத்தில், மெக்காலே கல்கினுடன் இணைந்து அவர் நடித்த ‘புறா பெண்மனி’ (Pigeon Lady) கதாபாத்திரம் இன்று வரை சினிமா ரசிகர்களால் மறக்க முடியாத ஒன்றாகத் திகழ்கிறது. பல தசாப்தங்களாகத் தனது தனித்துவமான நடிப்பால் சர்வதேசத் திரையுலகை ஆக்கிரமித்திருந்த பிரெண்டா ஃபிரிக்கரின் மறைவு, உலகெங்கிலும் உள்ள சினிமா ரசிகர்களிடமும் கலைஞர்களிடமும் பெரும் சோகத்தை ஏற்படுத்தியுள்ளது.
