“காங்கிரஸின் நோக்கமே இடையூறு செய்வதுதான்… தீர்வு அல்ல!” – நிர்மலா சீதாராமன் காரசாரம்!
புது டெல்லி: வினாத்தாள் கசிவு விவகாரத்தில் காங்கிரஸ் கட்சி முறையான தீர்வை விரும்பவில்லை என்றும், வெறும் குழப்பத்தையும் இடையூறுகளையுமே உருவாக்க விரும்புவதாகவும் மத்திய நிதியமைச்சர் நிர்மலா சீதாராமன் கடுமையாக விமர்சித்துள்ளார். டெல்லியில் செய்தியாளர்களைச் சந்தித்த அவர், நீட் விவகாரத்தையும் இளம் மாணவர்களையும் பயன்படுத்தி காங்கிரஸ் கட்சி தனது வழக்கமான பாணியில் நாடாளுமன்ற நடவடிக்கைகளை முடக்கி வருவதாகக் குற்றம்சாட்டினார்.
மத்தியக் கல்வி அமைச்சர் தர்மேந்திர பிரதான் பதவி விலக வலியுறுத்தி ‘கரப்பான் பூச்சி ஜனதா கட்சி’ (சிஜேபி) நடத்தும் போராட்டத்திற்கு எதிர்க்கட்சிகள் ஆதரவு அளித்து வருகின்றன. நாடாளுமன்றத்தில் எதிர்க்கட்சி எம்பிக்கள் தொடர் அமளியில் ஈடுபடுவதால் மழைக்காலக் கூட்டத்தொடர் முடங்கியுள்ள நிலைக்குப் பதிலளித்த நிதியமைச்சர், அரசு இந்த விவகாரத்தில் உணர்வுப்பூர்வமாகவே செயல்பட்டு வருகிறது என்றார். வினாத்தாள் கசிவில் ஈடுபட்டவர்களுக்குக் கடுமையான தண்டனை வழங்கப்படும் என்றும், இதற்காக விரைவு நீதிமன்றங்கள் அமைக்கப்படும் என்றும் பிரதமரே நேரடியாக அறிவித்துள்ளதைச் சுட்டிக்காட்டினார்.
பிரதமரின் இல்லம் அமைந்துள்ள பகுதியில் அனுமதியின்றிப் போராட்டம் நடத்திய காங்கிரஸாரிடம் அமைச்சர்கள் பேச்சுவார்த்தை நடத்தியபோது, நாடாளுமன்றத்தில் விவாதம் நடத்த வேண்டும் என்ற கோரிக்கையை முன்வைத்தனர். அந்தக் கோரிக்கையை அரசு உடனடியாக ஏற்றுக்கொண்ட போதிலும், தற்போது மேலும் பல நிபந்தனைகளை விதித்து நாடாளுமன்றத்தில் விவாதம் நடைபெறாமல் காங்கிரஸ் தவிர்த்து வருவதாக அவர் சாடினார். அவையில் விவாதம் நடந்தால் உண்மை அம்பலமாகிவிடும் என்பதாலேயே அவர்கள் இவ்வாறான கூச்சல்களில் ஈடுபடுகின்றனர் என்றும் அவர் தெரிவித்தார்.
எனவே, உணர்வுப்பூர்வமான இந்த விவகாரத்தை அரசியலாக்குவதைக் கைவிட்டு, நாடாளுமன்றத்தில் விரிவான விவாதத்தில் ஈடுபடுமாறு எதிர்க்கட்சிகளுக்கு நிர்மலா சீதாராமன் வேண்டுகோள் விடுத்துள்ளார். பதில் அளிக்க அமைச்சர்களும் அவையின் தலைவரும் தயாராக இருக்கும் நிலையில், பேச்சைத் தடுத்து இடையூறு செய்வதில் எந்தப் பயனும் இல்லை என்றும், காங்கிரஸ் கட்சிக்குத் தீர்வுகள் தேவையில்லை என்பதே இதன் மூலம் தெளிவாகிறது என்றும் அவர் மேலும் குறிப்பிட்டுள்ளார்.
