மகாராஷ்டிரா டெட் தேர்வு வினாத்தாள் கசிவு வழக்கில் முக்கிய குற்றவாளி பிஹாரில் கைது
மகாராஷ்டிராவில் கடந்த ஆண்டு நடைபெற்ற ஆசிரியர் தகுதித் தேர்வு (டெட்) வினாத்தாள் கசிவு வழக்கில் தலைமறைவாக இருந்து வந்த முக்கிய குற்றவாளி பிஜேந்திர குப்தாவை போலீஸார் கைது செய்துள்ளனர். பல மாதங்களாக தேடப்பட்டு வந்த அவர், பிஹாரில் பதுங்கியிருந்த நிலையில் மகாராஷ்டிர போலீஸின் தனிப்படை நடவடிக்கையால் சிக்கியுள்ளார்.
டெட் தேர்வு நடைபெறுவதற்கு முன்பே வினாத்தாள் கசிந்தது பெரும் சர்ச்சையை ஏற்படுத்தியிருந்தது. இதையடுத்து போலீஸார் வழக்குப் பதிவு செய்து தீவிர விசாரணை மேற்கொண்டனர். இந்த வழக்கில் முக்கிய தொடர்புடைய நபராக கருதப்பட்ட பிஜேந்திர குப்தா கைது நடவடிக்கைகளில் இருந்து தப்பித்து பல மாதங்களாக தலைமறைவாக இருந்ததாக கூறப்படுகிறது.
பின்னர் அவர் பிஹாரில் இருப்பது குறித்து கிடைத்த ரகசிய தகவலின் அடிப்படையில், மகாராஷ்டிர போலீஸின் சிறப்பு குழு அங்கு சென்று அவரை கைது செய்தது. தற்போது அவரை மகாராஷ்டிராவுக்கு அழைத்துச் சென்று விரிவான விசாரணை நடத்த போலீஸார் திட்டமிட்டுள்ளனர்.
மேலும், நாட்டின் பல்வேறு பகுதிகளில் நடைபெற்ற பிற வினாத்தாள் கசிவு சம்பவங்களிலும் பிஜேந்திர குப்தாவுக்கு தொடர்பு இருக்கலாம் என்ற சந்தேகமும் விசாரணை அதிகாரிகளுக்கு எழுந்துள்ளது. இதனால் அவரது கைது, பல்வேறு தேர்வு முறைகேடு வழக்குகளில் புதிய தகவல்களை வெளிக்கொண்டு வரும் என எதிர்பார்க்கப்படுகிறது.
இந்த வழக்கில், பிஜேந்திர குப்தாவின் மனைவியும் ஏற்கனவே போலீஸாரால் கைது செய்யப்பட்டிருந்தது குறிப்பிடத்தக்கது. தற்போது நடைபெறவுள்ள விசாரணையின் மூலம் வினாத்தாள் கசிவு வலையமைப்பு குறித்து மேலும் முக்கிய தகவல்கள் கிடைக்கலாம் என போலீஸார் நம்பிக்கை தெரிவித்துள்ளனர்.
