இளையோர் ஹாக்கி 5 ஆசிய சாம்பியன்ஷிப்: பாகிஸ்தானை வீழ்த்தி இந்திய சிறுவர்கள் அபார வெற்றி
சர்வதேச ஹாக்கி சம்மேளனம் சார்பில் ஓமன் தலைநகர் மஸ்கட்டில் நடைபெற்று வரும் இளையோருக்கான ஹாக்கி 5 ஆசிய சாம்பியன்ஷிப் போட்டியில், இந்திய சப்-ஜூனியர் சிறுவர் அணி சிறப்பான ஆட்டத்தை வெளிப்படுத்தி வெற்றி பெற்றுள்ளது.
நடைபெற்ற போட்டியில் இந்திய அணி, பாகிஸ்தான் அணியை எதிர்கொண்டு விளையாடியது. இதில் தொடக்கம் முதலே ஆதிக்கம் செலுத்திய இந்திய வீரர்கள், 7-3 என்ற கோல் கணக்கில் பாகிஸ்தான் அணியை வீழ்த்தி அசத்தினர்.
இந்த போட்டியின் போது பாகிஸ்தான் அணி விதிமுறைகளை மீறி 5 வீரர்களுக்கு பதிலாக 6 வீரர்களுடன் களத்தில் விளையாடியது. இதனை கவனித்த நடுவர்கள் உடனடியாக நடவடிக்கை எடுத்து, அந்த அணிக்கு அபராதம் விதித்ததுடன், இரண்டு வீரர்களை வெளியேற்றினர்.
இதன் காரணமாக பாகிஸ்தான் அணி 3 வீரர்களுடன் மட்டுமே போட்டியை தொடர வேண்டிய நிலை ஏற்பட்டது. இந்த வாய்ப்பை பயன்படுத்திக் கொண்ட இந்திய அணி, தனது ஆதிக்கத்தை தொடர்ந்தது.
இதற்கிடையில், சப்-ஜூனியர் சிறுமியர் பிரிவு போட்டியில் இந்திய அணி சீனாவை எதிர்கொண்டது. இதில் இந்திய வீராங்கனைகள் போராடிய போதிலும், 3-6 என்ற கோல் கணக்கில் சீனாவிடம் தோல்வியை சந்தித்தனர்.
