சோனியா, ராகுல் சந்திப்பு ரத்து: 2 நாள் டெல்லி பயணத்தை முடித்துக்கொண்டு தமிழகம் புறப்பட்டார் முதலமைச்சர் விஜய்!
புதுடெல்லி:
இரண்டு நாள் அரசுமுறைப் பயணமாகப் புதுடெல்லி சென்றிருந்த தமிழக முதலமைச்சர் ஜோசப் விஜய், தனது பயணத் திட்டங்களை முடித்துக்கொண்டு அவசரமாகத் தமிழகம் புறப்பட்டார். முதலமைச்சராகப் பதவியேற்ற பிறகு முதன்முறையாக டெல்லி சென்ற அவர், பிரதமர் நரேந்திர மோடி மற்றும் மத்திய நிதியமைச்சர் நிர்மலா சீதாராமன் ஆகியோரைத் தனித்தனியாக நேரில் சந்தித்து, தமிழகத்தின் வளர்ச்சித் திட்டங்களுக்கான கோரிக்கை மனுக்களை அளித்துப் பேசினார். இச்சந்திப்புகள் அரசியல் மற்றும் நிர்வாக ரீதியாகப் பெரும் முக்கியத்துவம் வாய்ந்ததாகப் பார்க்கப்பட்டன.
இதனைத் தொடர்ந்து, பயணத்தின் இறுதி நாளான இன்று காலை, காங்கிரஸ் கட்சியின் மூத்த தலைவர்களான சோனியா காந்தி மற்றும் ராகுல் காந்தி ஆகியோரைச் சந்திப்பதற்காக முதலமைச்சர் விஜய் தரப்பில் இருந்து முறைப்படி நேரம் (Appointment) கேட்கப்பட்டிருந்தது. எனினும், காங்கிரஸ் தலைமை தரப்பில் இருந்து சந்திப்பிற்கான நேரம் ஒதுக்கீடு செய்யப்படாமல் எவ்விதப் பதிலும் வரவில்லை எனக் கூறப்படுகிறது. அதேநேரத்தில், முதலமைச்சர் விஜய் அவசரமாகச் சென்னை திரும்ப வேண்டிய கட்டாயச் சூழல் ஏற்பட்டதன் காரணமாகவே இந்தச் சந்திப்புகள் ரத்து செய்யப்பட்டதாக அரசுத் தரப்பு வட்டாரங்கள் தெரிவித்துள்ளன. இதனையடுத்து, டெல்லியில் உள்ள தமிழ்நாடு இல்லத்தில் உயர் அதிகாரிகளுடன் அவசர ஆலோசனையில் ஈடுபட்ட முதலமைச்சர் ஜோசப் விஜய், டெல்லி பயணத்தை நிறைவு செய்து கொண்டு தனி விமானம் மூலம் தமிழகம் புறப்பட்டார்.
