வைகாசி விசாகம்: திருச்செந்தூர் முருகன் கோயிலில் ₹100 கட்டண தரிசனம் அதிரடி ரத்து – மே 31 வரை அமல்!
திருச்செந்தூர்:
முருகப்பெருமானின் அறுபடை வீடுகளில் இரண்டாம் படை வீடாக உலகப் புகழ்பெற்ற திருச்செந்தூர் அருள்மிகு சுப்பிரமணிய சுவாமி திருக்கோயிலில், வரவிருக்கும் வைகாசி விசாகத் திருவிழாவை முன்னிட்டு ₹100 கட்டண தரிசன முறை முற்றிலும் ரத்து செய்யப்படுவதாகக் கோயில் நிர்வாகம் அறிவித்துள்ளது. ஆண்டுதோறும் வைகாசி விசாகத் திருவிழாவின் போது லட்சக்கணக்கான பக்தர்கள் திருச்செந்தூரில் குவிந்து சுவாமி தரிசனம் செய்வது வழக்கம். அந்த வகையில், இந்த ஆண்டிற்கான வைகாசி விசாகப் பெருவிழா வரும் மே 30-ஆம் தேதி மிக விமரிசையாக நடைபெறவுள்ளதால், வழக்கத்தை விடப் பக்தர்களின் கூட்டம் பல மடங்கு அதிகரிக்கும் என எதிர்பார்க்கப்படுகிறது.
இதனைக் கருத்தில் கொண்டும், சாமானிய பக்தர்கள் எவ்வித சிரமமுமின்றி விரைவாகச் சுவாமி தரிசனம் செய்வதை உறுதி செய்யவும் ஏதுவாக, இன்றிலிருந்து (மே 28) வரும் மே 31-ஆம் தேதி வரை நான்கு நாட்களுக்கு நூறு ரூபாய் கட்டண தரிசனம் தற்காலிகமாக ரத்து செய்யப்பட்டுள்ளது. இந்த நாள்களில் பக்தர்கள் எவ்வித சிறப்பு நிலைக் கட்டணமும் செலுத்தாமல், பொது வழியிலேயே சென்று முருகப்பெருமானை இலவசமாகத் தரிசிக்கலாம் எனத் தெரிவிக்கப்பட்டுள்ளது. திருவிழாக் காலங்களில் நிலவும் கடும் கூட்ட நெரிசலைக் கட்டுப்படுத்தவும், பக்தர்களுக்குத் தேவையான குடிநீர், நிழற்பந்தல் உள்ளிட்ட அடிப்படை வசதிகளை தடையின்றி வழங்கவும் கோயில் நிர்வாகமும் மாவட்டக் காவல்துறையும் இணைந்து விரிவான பாதுகாப்பு ஏற்பாடுகளைச் செய்துள்ளன.
