அமெரிக்கா செல்லும் இந்திய மாணவர்களுக்கு வழங்கப்பட்ட விசா 62% சரிவு; புதிய தரவுகள் கவலை அளிக்கின்றன
2025 ஆம் ஆண்டில் அமெரிக்காவில் உயர்கல்வி தொடர விரும்பிய இந்திய மாணவர்களுக்கு வழங்கப்பட்ட மாணவர் விசாக்களின் எண்ணிக்கை கடந்த ஆண்டுடன் ஒப்பிடும்போது 62 சதவீதம் குறைந்துள்ளதாக புதிய ஆய்வு தகவல் வெளியாகியுள்ளது. அமெரிக்க குடியேற்ற கொள்கைகள் மற்றும் விசா வழங்கும் நடைமுறைகளில் ஏற்பட்ட மாற்றங்கள் இந்த சரிவுக்கு காரணமாக இருக்கலாம் என கல்வித்துறை வட்டாரங்களில் கருத்து தெரிவிக்கப்படுகிறது.
சிஐஎஸ் (Center for Immigration Studies) அமைப்பு ஆய்வு செய்த தரவுகளை மேற்கோள்காட்டி பிடிஐ வெளியிட்டுள்ள தகவலின்படி, 2024 ஆம் ஆண்டில் மாணவர் விசா பெற்று அமெரிக்கா சென்ற இந்திய மாணவர்களின் எண்ணிக்கை 58,694 ஆக இருந்தது. ஆனால், 2025 ஆம் ஆண்டில் அது 22,149 ஆக குறைந்துள்ளது. இதன் மூலம் ஒரே ஆண்டில் 62 சதவீத வீழ்ச்சி பதிவாகியுள்ளது.
இந்திய மாணவர்கள் மட்டுமல்லாமல், சீன மாணவர்களுக்கும் வழங்கப்பட்ட அமெரிக்க மாணவர் விசாக்களின் எண்ணிக்கையிலும் குறிப்பிடத்தக்க சரிவு ஏற்பட்டுள்ளது. 2024 ஆம் ஆண்டில் 61,075 சீன மாணவர்களுக்கு விசா வழங்கப்பட்ட நிலையில், 2025 ஆம் ஆண்டில் அந்த எண்ணிக்கை 40,034 ஆக குறைந்துள்ளது. இது 34 சதவீத சரிவை வெளிப்படுத்துகிறது.
அதேவேளையில், சர்வதேச கல்விக்கான நிறுவனம் (Institute of International Education) வெளியிட்டுள்ள வருடாந்திர கணக்கெடுப்பின்படி, 2024–25 கல்வியாண்டில் அமெரிக்காவில் உயர்கல்வி பயின்ற வெளிநாட்டு மாணவர்களின் மொத்த எண்ணிக்கை 11,77,766 ஆக இருந்தது. இதில் இந்திய மாணவர்கள் 3,63,019 பேரும், சீன மாணவர்கள் 2,65,919 பேரும் இடம்பெற்றுள்ளனர்.
இந்தியா மற்றும் சீனாவைச் சேர்ந்த மாணவர்கள் இணைந்து அமெரிக்காவில் கல்வி பயிலும் மொத்த வெளிநாட்டு மாணவர்களில் சுமார் 53 சதவீதத்தை கொண்டிருந்தனர். இருப்பினும், புதிய மாணவர் விசாக்களின் எண்ணிக்கையில் ஏற்பட்டுள்ள இந்த சரிவு, எதிர்காலத்தில் அமெரிக்க பல்கலைக்கழகங்களில் சர்வதேச மாணவர்களின் சேர்க்கை நிலவரத்தில் மாற்றத்தை ஏற்படுத்தக்கூடும் என்றும், அதே நேரத்தில் அமெரிக்க மாணவர்களுக்கு கூடுதல் கல்வி வாய்ப்புகளை உருவாக்கும் சூழல் உருவாகலாம் என்றும் ஆய்வாளர்கள் தெரிவிக்கின்றனர்.
