இலங்கை – இந்தியா டெஸ்ட் தொடரை மைதானத்தில் ரசிகர்கள் இலவசமாக காணலாம்: புதிய அறிவிப்பு
இந்திய கிரிக்கெட் அணி இலங்கையில் சுற்றுப்பயணம் மேற்கொண்டு, அந்த அணிக்கு எதிராக டெஸ்ட் போட்டிகளில் விளையாடி வருகிறது. இரு அணிகளுக்கு இடையிலான முதல் டெஸ்ட் போட்டி வரும் 15-ம் தேதி முதல் 19-ம் தேதி வரை காலே நகரில் நடைபெற உள்ளது.
இதைத்தொடர்ந்து, தொடரின் 2-வது மற்றும் கடைசி டெஸ்ட் போட்டி வரும் 23-ம் தேதி கொழும்பு நகரில் தொடங்க உள்ளது. இந்த இரண்டு டெஸ்ட் போட்டிகளையும் மைதானத்தில் நேரடியாக காண ரசிகர்களுக்கு இலவச அனுமதி வழங்கப்பட உள்ளதாக இலங்கை கிரிக்கெட் வாரியம் அறிவித்துள்ளது.
சமீபகாலமாக டெஸ்ட் கிரிக்கெட் போட்டிகளை நேரில் காண மைதானங்களுக்கு வரும் ரசிகர்களின் எண்ணிக்கை குறைந்து வருவதாக தெரிவிக்கப்பட்டுள்ளது. இதனை கருத்தில் கொண்டு, போட்டிகளுக்கு ரசிகர்களை அதிக அளவில் வரவழைக்கும் நோக்கில் இலங்கை கிரிக்கெட் வாரியம் இந்த முடிவை எடுத்துள்ளதாக கூறப்படுகிறது.
இதன் மூலம் இந்தியா – இலங்கை அணிகளுக்கு இடையிலான டெஸ்ட் போட்டிகளை ரசிகர்கள் எந்தவித நுழைவுக் கட்டணமும் செலுத்தாமல் மைதானத்தில் நேரடியாகக் கண்டுகளிக்க முடியும். டெஸ்ட் கிரிக்கெட்டுக்கு ரசிகர்களிடையே மீண்டும் ஆர்வத்தை அதிகரிக்கும் முயற்சியாக இந்த இலவச அனுமதி நடவடிக்கை பார்க்கப்படுகிறது.
