“விவசாயிகளுக்கு ஏன் இவ்வளவு குறைவான நிதி?” – சட்டப்பேரவையில் சவுமியா அன்புமணி கேள்வி
தமிழக பட்ஜெட்டில் விவசாயிகளுக்கான நிதி ஒதுக்கீடு குறைவாக இருப்பதாக சட்டப்பேரவையில் சவுமியா அன்புமணி கேள்வி எழுப்பியுள்ளார். பயிர்க்கடனை முழுமையாகத் தள்ளுபடி செய்வது தொடர்பான அறிவிப்பு இடம்பெறாதது மிகுந்த ஏமாற்றத்தை அளிப்பதாகவும், சுமார் 5 கோடி விவசாய மக்களுக்கு ரூ.14 ஆயிரம் கோடி மட்டுமே ஒதுக்கப்பட்டுள்ளது போதுமானதாக இல்லை என்றும் அவர் தெரிவித்துள்ளார்.
சட்டப்பேரவையில் பட்ஜெட் தொடர்பான விவாதத்தில் பேசிய சவுமியா அன்புமணி, தமிழக விவசாயிகளின் கூட்டுறவு கடன்களை முழுமையாக தள்ளுபடி செய்வது குறித்த அறிவிப்பு வெளியாகாதது ஏமாற்றம் அளிப்பதாக குறிப்பிட்டார். தமிழகத்தின் மக்கள் தொகை சுமார் 8 கோடியாக இருக்கும் நிலையில், அதில் சுமார் 5 கோடி பேர் விவசாயத்துடன் தொடர்புடையவர்களாக இருப்பார்கள் என்றும், ஆனால் வேளாண் பட்ஜெட்டுக்கு ரூ.14 ஆயிரம் கோடி மட்டுமே ஒதுக்கப்பட்டிருப்பதாகவும் அவர் சுட்டிக்காட்டினார்.
கால்நடை, பால்வளம், வனத்துறை, கூட்டுறவு உள்ளிட்ட 22 துறைகளுக்கும் சேர்த்து ரூ.58 ஆயிரம் கோடி நிதி ஒதுக்கப்பட்டுள்ளதாகவும், அதில் வேளாண் துறைக்கு மட்டும் ரூ.14 ஆயிரம் கோடி வழங்கப்பட்டிருப்பது மிகவும் குறைவானது என்றும் சவுமியா அன்புமணி தெரிவித்தார். சுமார் 2 மணி நேரம் வேளாண் அமைச்சர் பட்ஜெட்டை தாக்கல் செய்தபோதிலும், தாங்கள் எதிர்பார்த்த பல்வேறு முக்கிய அம்சங்கள் அதில் இடம்பெறவில்லை என்றும் அவர் கூறினார்.
விவசாயிகளின் முக்கிய தேவைகளில் ஒன்றான நீர்ப்பாசன திட்டங்களுக்கு கூடுதல் நிதி ஒதுக்கப்பட்டிருக்க வேண்டும் என்றும் சவுமியா அன்புமணி வலியுறுத்தினார். பாலாறு, காவிரி உள்ளிட்ட 35 ஆறுகளில் சுமார் 10 கிலோமீட்டர் இடைவெளிக்கு ஒரு தடுப்பணை அமைத்தால் கடலில் வீணாக கலக்கும் நீரை சேமிக்க முடியும் என்றும், அதன் மூலம் தண்ணீருக்காக கேரளா மற்றும் கர்நாடகாவை சார்ந்திருக்க வேண்டிய நிலை குறையும் என்றும் அவர் தெரிவித்தார்.
தமிழகத்தில் முன்பு சுமார் 42 ஆயிரம் ஏரிகள் இருந்த நிலையில், தற்போது அந்த எண்ணிக்கை 27 ஆயிரமாக குறைந்துள்ளதாகவும் அவர் குறிப்பிட்டார். எஞ்சியுள்ள ஏரிகளை முறையாக தூர்வாரி பராமரித்தாலே சுமார் 100 முதல் 150 டிஎம்சி தண்ணீரை சேமித்து வைக்க முடியும் என்றும் சவுமியா அன்புமணி கூறினார்.
பெண்கள் மற்றும் விவசாயிகளுக்கான சில திட்டங்கள், இயற்கை விஞ்ஞானி விருது அறிவிப்பு ஆகியவற்றை வரவேற்பதாகவும் அவர் தெரிவித்தார். அதே நேரத்தில், பதிவு செய்த விவசாயிகளுக்கு இலவச மின்சாரத் திட்டம் வழங்கப்படாதது குறித்து கேள்வி எழுப்பிய அவர், தமிழக அரசு இந்தத் திட்டத்தை உடனடியாக செயல்படுத்த வேண்டும் என்றும் வலியுறுத்தினார்.
மேலும், பட்ஜெட்டில் பல்வேறு மானியங்கள் அறிவிக்கப்பட்டாலும், அவற்றின் பயன்கள் சிறு மற்றும் குறு விவசாயிகளிடம் போதிய அளவில் சென்றடைவதில்லை என்றும் அவர் குற்றம்சாட்டினார். 1 அல்லது 2 ஏக்கர் நிலம் வைத்திருக்கும் விவசாயிகளுக்கு மானியத் திட்டங்கள் குறித்த தகவல்கள் தெரிவதில்லை என்றும், பெரிய அளவில் நிலம் வைத்திருப்பவர்களே அவற்றை அதிகமாக பயன்படுத்திக் கொள்வதாகவும் அவர் தெரிவித்தார்.
விவசாயத்தைப் போலவே மனித வளமும் தமிழகத்தின் முக்கியமான பலம் என்றும் சவுமியா அன்புமணி கூறினார். லட்சக்கணக்கான இளைஞர்கள் வேலைவாய்ப்பின்றி இருப்பதாகவும், பலர் அரசு தேர்வுகளை எழுதி முடித்து வேலைக்காக காத்திருப்பதாகவும் அவர் தெரிவித்தார். அவர்களுக்கு அரசு வேலை என்பது கானல் நீராக இருப்பதாகவும், பட்ஜெட்டில் இதற்கான முக்கிய அறிவிப்புகள் இடம்பெறும் என எதிர்பார்த்த நிலையில் அவை இல்லாதது ஏமாற்றம் அளிப்பதாகவும் கூறினார்.
மேலும், டாஸ்மாக் கடைகளை படிப்படியாக குறைக்க வேண்டும் என்ற எதிர்பார்ப்பையும் அவர் வெளிப்படுத்தினார். இறுதியாக, தருமபுரி மாவட்டத்தில் காவிரி உபரிநீர் திட்டத்தை செயல்படுத்த வேண்டும் என்றும், விவசாயிகளை அரசு கைவிடக்கூடாது என்றும் சவுமியா அன்புமணி வலியுறுத்தினார்.
