முதல்வர் விஜய் தலைமையில் நடந்த எம்.பி.க்கள் கூட்டத்தில் தொகுதி மறுவரையறைக்கு எதிராக தீர்மானம்
தொகுதி மறுவரையறை மசோதா தொடர்பாக விவாதிப்பதற்காக தவெக அரசு ஏற்பாடு செய்த தமிழக எம்.பி.க்கள் ஆலோசனைக் கூட்டம் இன்று சென்னை கலைவாணர் அரங்கில் முதல்வர் விஜய் தலைமையில் நடைபெற்றது. இந்தக் கூட்டத்தில், தொகுதி மறுவரையறை மசோதாவை மத்திய அரசு கைவிட வேண்டும் என ஒருமனதாக தீர்மானம் நிறைவேற்றப்பட்டது.
நாடாளுமன்றத்தின் மழைக்காலக் கூட்டத்தொடர் கடந்த ஜூலை 20-ம் தேதி தொடங்கி நடைபெற்று வரும் நிலையில், திருத்தப்பட்ட தொகுதி மறுவரையறை மசோதாவை மீண்டும் கொண்டுவர மத்திய அரசு முயற்சித்து வருவதாக தகவல்கள் வெளியாகியுள்ளன. இதனைத் தொடர்ந்து, தமிழகத்தின் தொகுதி மறுவரையறை தொடர்பாக விவாதிக்க முதல்வர் விஜய் தலைமையில் இந்த ஆலோசனைக் கூட்டம் ஏற்பாடு செய்யப்பட்டது.
இந்தக் கூட்டத்தை திமுக, அதிமுக உள்ளிட்ட பிரதான எதிர்க்கட்சிகள் புறக்கணித்தன. மேலும், பாமக, மநீம, தேமுதிகவைச் சேர்ந்த எம்.பி.க்களும் பங்கேற்காததால் மொத்தம் 37 எம்.பி.க்கள் கூட்டத்தில் கலந்துகொள்ளவில்லை. அதேநேரத்தில், தவெக கூட்டணியில் இடம்பெற்றுள்ள காங்கிரஸின் 11 எம்.பி.க்கள், விசிக, சிபிஎம், சிபிஐ கட்சிகளின் தலா 2 எம்.பி.க்கள், ஐயுஎம்எல் மற்றும் மதிமுகவின் தலா ஒரு எம்.பி. என மொத்தம் 19 பேர் கூட்டத்தில் பங்கேற்றனர். காங்கிரஸ் எம்.பி. சுதா மட்டும் கூட்டத்தில் கலந்துகொள்ளவில்லை.
சுமார் இரண்டு மணி நேரம் நடைபெற்ற ஆலோசனைக் கூட்டத்தில் பங்கேற்ற பல்வேறு கட்சிகளின் எம்.பி.க்கள் தொகுதி மறுவரையறை தொடர்பாக தங்களது கருத்துகளை தெரிவித்தனர். தவெக அரசு சார்பில் முதல்வர் விஜய் மற்றும் அமைச்சர்கள் ஆனந்த், ஆதவ் அர்ஜுனா, ராஜ்மோகன், நிர்மல்குமார் உள்ளிட்டோர் கூட்டத்தில் கலந்துகொண்டனர்.
கூட்டத்துக்குப் பின்னர் செய்தியாளர்களிடம் பேசிய அமைச்சர் நிர்மல்குமார், தமிழகத்தின் உரிமைகளை பாதிக்கும் வகையில் தொகுதி மறுவரையறை மசோதாவை மத்திய அரசு நிறைவேற்ற முயற்சித்து வருவதாக தெரிவித்தார். இந்த ஆலோசனைக் கூட்டத்தில் தொகுதி மறுவரையறைக்கு எதிராக அனைத்து தரப்பினரும் ஒருமித்த கருத்துடன் தீர்மானம் நிறைவேற்றியதாகவும் அவர் கூறினார்.
இதுகுறித்து விசிக எம்.பி. திருமாவளவன் கூறுகையில், முதல்வர் விஜய் தலைமையில் நடைபெற்ற கூட்டத்தில் தங்கள் கட்சி சார்பில் பங்கேற்றதாகவும், மூத்த தலைவர் ப.சிதம்பரமும் கலந்து கொண்டதாகவும் தெரிவித்தார். அனைத்து கட்சிகளின் சார்பிலும் எம்.பி.க்கள் தங்களது கருத்துகளை தெரிவித்ததாகவும், இறுதியாக முதல்வர் விஜய் உரையாற்றியதாகவும் அவர் குறிப்பிட்டார்.
கூட்டத்தின் நிறைவில், தொகுதி மறுவரையறை மசோதாவை மத்திய அரசு கைவிட வேண்டும் என்றும், மக்களவையில் தற்போதுள்ள 543 உறுப்பினர்கள் என்ற எண்ணிக்கையும், தமிழகத்துக்கான 39 மக்களவைத் தொகுதிகள் என்ற எண்ணிக்கையும் தொடர்ந்து பாதுகாக்கப்பட வேண்டும் என்றும் ஒருமனதாக தீர்மானம் நிறைவேற்றப்பட்டதாக திருமாவளவன் தெரிவித்தார்.
மேலும், மக்களவை உறுப்பினர்களின் எண்ணிக்கையை அதிகரிப்பதால் நாடாளுமன்றத்தின் செயல்பாடுகள் பாதிக்கப்படலாம் என்றும், இதனால் தொகுதி மறுவரையறை செய்யக்கூடாது என்ற அடிப்படையில் அனைத்து எம்.பி.க்களும் தங்களது கருத்துகளை முன்வைத்ததாகவும் அவர் கூறினார்.
காங்கிரஸ் எம்.பி. கார்த்தி சிதம்பரமும் தமிழகத்தின் உரிமைகள் எந்த வகையிலும் பாதிக்கப்படக் கூடாது என்பதில் ஒருமித்த கருத்து நிலவுவதாக தெரிவித்தார். மக்களவையில் தற்போதுள்ள 543 உறுப்பினர்கள் என்ற எண்ணிக்கையும், தமிழகத்துக்கான 39 தொகுதிகளும் பாதுகாக்கப்பட வேண்டும் என்றும் அவர் வலியுறுத்தினார். ஏற்கெனவே 543 உறுப்பினர்கள் பேசுவதற்கே போதிய நேரம் இல்லாத நிலையில், உறுப்பினர்களின் எண்ணிக்கையை 850 ஆக அதிகரித்தால் ஒவ்வொரு எம்.பி.க்கும் பேசுவதற்கான வாய்ப்பு மேலும் குறையும் என்றும் கார்த்தி சிதம்பரம் தெரிவித்தார்.
