பழநி நில மோசடி வழக்கில் கைதான அன்வர்தீன் மரணம்: சந்தேகங்களை தீர்க்க விசாரணை தேவை என நயினார் நாகேந்திரன்
பழநியில் ரூ.100 கோடி மதிப்பிலான நில மோசடி வழக்கில் கைது செய்யப்பட்டு சிறையில் அடைக்கப்பட்டிருந்த அன்வர்தீன் உயிரிழந்த சம்பவத்தை இயற்கையான மரணம் என்று மட்டும் கடந்து செல்ல முடியாது என தமிழக பாஜக தலைவர் நயினார் நாகேந்திரன் சந்தேகம் எழுப்பியுள்ளார். இந்த மரணம் தொடர்பாக முறையான விசாரணை நடத்த வேண்டும் என்றும் அவர் வலியுறுத்தியுள்ளார்.
இதுதொடர்பாக அவர் வெளியிட்டுள்ள எக்ஸ் தளப் பதிவில், பழநியில் ரூ.100 கோடி மதிப்பிலான நில மோசடி வழக்கில் கைது செய்யப்பட்டு சிறையில் இருந்த அன்வர்தீன், நெஞ்சுவலி காரணமாக திடீரென உயிரிழந்ததாகவும், இந்த வழக்கில் தொடர்புடைய சார்பதிவாளர் மணிகண்டன் உடல்நலக்குறைவு காரணமாக மருத்துவமனையில் அனுமதிக்கப்பட்டுள்ளதாகவும் வெளியாகியுள்ள தகவல்கள் அதிர்ச்சியையும் பல்வேறு சந்தேகங்களையும் ஏற்படுத்துவதாக குறிப்பிட்டுள்ளார்.
குற்றம் சாட்டப்பட்டவர்கள் சிறையில் அடைக்கப்படுவதற்கு முன்பாக முழுமையான மருத்துவப் பரிசோதனை மேற்கொள்ளப்படும் நிலையில், தவெக அரசின் மிகப்பெரிய ஊழலை வெளிக்கொண்டு வந்ததாக கூறப்படும் இந்த வழக்கில் தொடர்புடைய அன்வர்தீனுக்கு மட்டும் திடீரென நெஞ்சுவலி ஏற்பட்டது எப்படி என்றும் நயினார் நாகேந்திரன் கேள்வி எழுப்பியுள்ளார். மேலும், இந்த வழக்கில் முக்கிய சாட்சிகளாக கருதப்படும் இருவருக்கும் ஒரே நேரத்தில் உடல்நலக்குறைவு ஏற்பட்டிருப்பது குறித்தும் அவர் சந்தேகம் தெரிவித்துள்ளார்.
விஜய் முதல்வராகப் பொறுப்பேற்ற பிறகு காவல் நிலையங்கள் மற்றும் சிறைகளில் உள்ள குற்றவாளிகள் அதிகாரிகளால் தாக்கப்பட்டு உயிரிழக்கும் சம்பவங்கள் அதிகரித்து வருவதாக நயினார் நாகேந்திரன் குற்றம்சாட்டியுள்ளார். அந்தப் பின்னணியில், அன்வர்தீனின் மரணத்தை இயற்கையான நிகழ்வு என்று மட்டும் கருதி கடந்து செல்ல முடியாது என்றும் அவர் தெரிவித்துள்ளார்.
எனவே, அன்வர்தீன் உயிரிழந்தபோது பணியில் இருந்த அனைத்து சிறைக் காவல் அதிகாரிகளையும் விசாரணைக்கு உட்படுத்த வேண்டும் என்றும் நயினார் நாகேந்திரன் வலியுறுத்தியுள்ளார். மேலும், மரணத்திற்கான உண்மையான காரணம் மற்றும் பின்னணி குறித்து முறையான விசாரணை நடத்த முதல்வர் உத்தரவிட வேண்டும் என்றும் அவர் கேட்டுக்கொண்டுள்ளார்.
இதனிடையே, மருத்துவமனையில் சிகிச்சை பெற்று வரும் சார்பதிவாளர் மணிகண்டனுக்கு தேவையான அனைத்து மருத்துவ சிகிச்சைகளும் முறையாக வழங்கப்படுவதை அரசு உறுதி செய்ய வேண்டும் என்றும், அவருக்கு உரிய பாதுகாப்பு அளிக்க வேண்டும் என்றும் நயினார் நாகேந்திரன் வலியுறுத்தியுள்ளார்.
