திமுக திட்டங்களின் தொடர்ச்சியே வேளாண் பட்ஜெட்; புதிய அறிவிப்புகள் இல்லை: அன்புமணி ராமதாஸ் விமர்சனம்
தமிழக அரசின் முதல் வேளாண் நிதிநிலை அறிக்கையில் இடம்பெற்றுள்ள பெரும்பாலான அறிவிப்புகள், திமுக ஆட்சியில் அறிவிக்கப்பட்ட திட்டங்களின் தொடர்ச்சியாகவே உள்ளன என்றும், விவசாயிகளுக்கு புதிய நம்பிக்கை அளிக்கும் வகையிலான திட்டங்கள் இதில் இடம்பெறவில்லை என்றும் பாமக தலைவர் அன்புமணி ராமதாஸ் விமர்சித்துள்ளார்.
இதுகுறித்து அவர் வெளியிட்டுள்ள அறிக்கையில், வேளாண்மைக்கு தனி நிதிநிலை அறிக்கை தாக்கல் செய்ய வேண்டும் என்ற கோரிக்கைக்காக பாமக பல ஆண்டுகள் போராடியதாக குறிப்பிட்டார். ஆனால், அந்த நோக்கத்தை நிறைவேற்றும் வகையில் தற்போதைய வேளாண் பட்ஜெட் அமையவில்லை என்றும், இது விவசாயிகளுக்கு ஏமாற்றத்தையே அளித்துள்ளதாகவும் தெரிவித்தார்.
வேளாண் துறைக்கான நிதி ஒதுக்கீடு முந்தைய இடைக்கால பட்ஜெட்டுடன் ஒப்பிடுகையில் குறைக்கப்பட்டுள்ளதாக அவர் சுட்டிக்காட்டினார். வேளாண் துறைக்கு முன்பு ரூ.15,167.62 கோடி ஒதுக்கப்பட்டிருந்த நிலையில், தற்போது ரூ.14,696.70 கோடி மட்டுமே ஒதுக்கப்பட்டுள்ளதாகவும், இது ரூ.470.92 கோடி குறைவாக இருப்பதாகவும் கூறினார்.
வேளாண் நிதிநிலை அறிக்கையின் மொத்த மதிப்பு அதிகரித்ததாக அரசு தெரிவித்தாலும், அதில் ஊரக வளர்ச்சித் துறைக்கான நிதி உயர்வே முக்கிய காரணம் என்றும், 100 நாள் வேலைத்திட்டத்திற்கு பதிலாக 125 நாள் வேலைத்திட்டம் அறிமுகப்படுத்தப்பட்டதால் ஏற்பட்ட மாற்றமே இதற்கு காரணம் என்றும் அன்புமணி விளக்கினார். அந்த கூடுதல் ஒதுக்கீட்டை நீக்கிப் பார்த்தால், வேளாண் பட்ஜெட்டின் மொத்த மதிப்பு முந்தைய ஆண்டைவிட குறைவாக இருப்பதாக அவர் தெரிவித்தார்.
நிதிநிலை அறிக்கையின் மொத்த மதிப்பில் 25 சதவீதம் வேளாண்மை மற்றும் அதனுடன் தொடர்புடைய துறைகளுக்கு ஒதுக்கப்பட வேண்டும் என்ற பாமகவின் கோரிக்கை ஏற்கப்படவில்லை என்றும், வேளாண்மைக்கான நிதி ஒதுக்கீடு போதுமானதாக இல்லை என்றும் அவர் குற்றம்சாட்டினார்.
தேர்தல் வாக்குறுதிகளின்படி நெல்லுக்கு குவிண்டாலுக்கு ரூ.3,500 மற்றும் கரும்புக்கு டன்னுக்கு ரூ.4,500 கொள்முதல் விலை வழங்கப்படும் என அறிவிக்கப்பட்டிருந்த நிலையில், அதுகுறித்து வேளாண் பட்ஜெட்டில் எந்த அறிவிப்பும் இடம்பெறவில்லை என்றும் அவர் குறிப்பிட்டார். மேலும், நெல் கொள்முதல் நிலையங்களில் விவசாயிகள் எதிர்கொள்ளும் சிரமங்களுக்கு நிரந்தர தீர்வாக கிடங்கு வசதிகள் ஏற்படுத்தப்படாமல், தார்ப்பாய்கள் வழங்குவது மட்டுமே அறிவிக்கப்பட்டிருப்பது போதுமானதல்ல என்றும் விமர்சித்தார்.
பயறு மற்றும் எண்ணெய் வித்துகள் சாகுபடி பரப்பை அதிகரிக்கும் இலக்கு அறிவிக்கப்பட்டிருந்தாலும், அதற்கான ஊக்கத்தொகை வழங்கப்படாததால் அந்த முயற்சி வெற்றியடைய வாய்ப்பில்லை என்றும் அன்புமணி தெரிவித்தார். அதேசமயம், அதிக விளைச்சல் பெறும் விவசாயிகளுக்கு வழங்கப்படும் விருதுகளுக்கு கடலூர் அஞ்சலையம்மாள் பெயர் சூட்டப்பட்டிருப்பதை வரவேற்ற அவர், பட்ஜெட் மீதான விவாதத்துக்கு பதிலளிக்கும் போது விவசாயிகளுக்கு பயனளிக்கும் புதிய அறிவிப்புகளை அரசு வெளியிட வேண்டும் என வலியுறுத்தினார்.
