உள்நாட்டு கலவர முயற்சிகளால் பிரதமரின் பணியை தடுக்க முடியாது: நயினார் நாகேந்திரன் கருத்து
பிரதமர் நரேந்திர மோடியின் தலைமையில் நாடு பல்வேறு துறைகளில் குறிப்பிடத்தக்க வளர்ச்சியை அடைந்துள்ளதாகவும், எந்தவித அரசியல் விமர்சனங்களாலும் அல்லது உள்நாட்டு கலவர முயற்சிகளாலும் அவரது தேசப்பணியை தடுக்க முடியாது என்றும் பாஜக மாநிலத் தலைவர் நயினார் நாகேந்திரன் தெரிவித்துள்ளார். இது தொடர்பாக அவர் தனது சமூக வலைதளமான ‘எக்ஸ்’ பதிவில் பல்வேறு கருத்துகளை பகிர்ந்துள்ளார்.
அந்த பதிவில், 2014 முதல் 2026 வரை இந்தியாவின் உட்கட்டமைப்பு வளர்ச்சி உலக அளவில் கவனம் பெற்றுள்ளதாக அவர் குறிப்பிட்டுள்ளார். பிரத்யேக சரக்கு ரயில் வழித்தடங்கள், விரைவுச்சாலை நெட்வொர்க், புதுப்பிக்கத்தக்க ஆற்றல் திறன், ரயில்வே மின்மயமாக்கல், விமான நிலையங்கள் மற்றும் மருத்துவக் கல்லூரிகள் உள்ளிட்ட பல்வேறு துறைகளில் குறிப்பிடத்தக்க முன்னேற்றம் ஏற்பட்டுள்ளதாகவும், இவை அனைத்தும் “வளர்ச்சியடைந்த பாரதம்” என்ற இலக்கை நோக்கி நாட்டை முன்னேற்றிச் செல்கின்றன என்றும் தெரிவித்துள்ளார்.
மேலும், நாட்டின் பாதுகாப்பு, இளைஞர்களின் எதிர்காலம் மற்றும் பெண்களின் முன்னேற்றம் ஆகியவற்றை மையமாகக் கொண்டு பிரதமர் மோடி எடுத்துள்ள துணிச்சலான முடிவுகளே இந்த வளர்ச்சிக்கான முக்கிய காரணம் என்றும் நயினார் நாகேந்திரன் கூறியுள்ளார். மக்கள் நலனை முன்னிலைப்படுத்தி, தெளிவான தொலைநோக்கு பார்வையுடன் ஆட்சியை வழிநடத்தி வரும் பிரதமரின் தலைமைத்துவத்திற்கு தனது நன்றியையும் அவர் தெரிவித்துள்ளார்.
அரசியல் ரீதியாக தொடர்ந்து தோல்விகளை ஏற்க முடியாத சிலர் உள்நாட்டு கலவரத்தைத் தூண்ட முயற்சிப்பதாகவும், அதுபோன்ற முயற்சிகள் இருந்தாலும் பிரதமர் நரேந்திர மோடியின் தேசப்பணி எவ்வித தடையும் இன்றி தொடரும் என்றும் நயினார் நாகேந்திரன் தனது பதிவில் வலியுறுத்தியுள்ளார். அவரது இந்தக் கருத்து அரசியல் வட்டாரங்களில் கவனத்தை ஈர்த்துள்ளது.
