விவசாயிகள் பிரச்சினையை முன்வைத்து திமுக கண்டன ஆர்ப்பாட்டம்; ஆகஸ்ட் 3-ம் தேதி தஞ்சையில் நடைபெறும் என ஸ்டாலின் அறிவிப்பு
விவசாயிகளின் கோரிக்கைகளை வலியுறுத்தியும், காவிரி உரிமை விவகாரத்தில் தமிழக அரசின் நடவடிக்கைகளை கண்டித்தும் வரும் ஆகஸ்ட் 3-ம் தேதி தஞ்சாவூரில் திமுக சார்பில் மாபெரும் கண்டன ஆர்ப்பாட்டம் நடைபெறும் என அக்கட்சியின் தலைவர் மு.க. ஸ்டாலின் அறிவித்துள்ளார்.
இதுகுறித்து அவர் வெளியிட்டுள்ள அறிக்கையில், விவசாயிகள் பல்வேறு பிரச்சினைகளால் பாதிக்கப்பட்டு போராட்டம் நடத்தி வரும் நிலையில், அரசு உரிய நடவடிக்கை எடுக்காமல் இருப்பதாக குற்றம்சாட்டியுள்ளார். தேர்தலுக்கு முன்பு தவெக அளித்த வாக்குறுதிகளுக்கும், தேர்தலுக்கு பிந்தைய அறிவிப்புகளுக்கும் இடையே வேறுபாடு இருப்பதாகவும் அவர் தெரிவித்துள்ளார்.
கூட்டுறவு வங்கிகளில் விவசாயிகள் பெற்ற பயிர்க்கடன்களை முழுமையாக தள்ளுபடி செய்வதாக அறிவித்த நிலையில், பின்னர் குறிப்பிட்ட தொகை வரையிலான கடன் தள்ளுபடி மட்டுமே அறிவிக்கப்பட்டதாகவும், இதனால் விவசாயிகள் அதிருப்தியடைந்து போராட்டத்தில் ஈடுபட்டு வருவதாகவும் ஸ்டாலின் கூறியுள்ளார்.
மேலும், மேகேதாட்டு அணை விவகாரத்தில் கர்நாடக அரசு தொடர்ந்து நடவடிக்கைகளை மேற்கொண்டு வருவதாகவும், இதற்கு எதிராக தமிழக அரசு போதிய நடவடிக்கை எடுக்கவில்லை என்றும் அவர் விமர்சித்துள்ளார். கர்நாடக முதல்வர் மற்றும் அதிகாரிகள் மேகேதாட்டு திட்டம் தொடர்பாக பல்வேறு ஆலோசனைகளை நடத்தி வரும் நிலையில், தமிழக அரசு மவுனமாக இருப்பதாகவும் குற்றம்சாட்டியுள்ளார்.
காவிரி நீர் விவகாரம் தொடர்பாக தமிழக முதல்வர் பிரதமருக்கு கடிதம் எழுதியதோடு தனது கடமை முடிந்துவிட்டதாக கருதக்கூடாது எனவும், மாநிலத்தின் முக்கிய பிரச்சினையில் அனைத்து கட்சிகள் மற்றும் விவசாய சங்கங்களுடன் ஆலோசனை நடத்த வேண்டும் எனவும் ஸ்டாலின் வலியுறுத்தியுள்ளார்.
குறுவை சாகுபடி பாதிப்பு குறித்தும் அவர் தனது அறிக்கையில் குறிப்பிட்டுள்ளார். கடந்த ஆண்டு 6.5 லட்சம் ஏக்கரில் குறுவை சாகுபடி நடைபெற்ற நிலையில், இந்த ஆண்டு மேட்டூர் அணை திறக்கப்படாததால் சாகுபடி பரப்பு குறைந்துள்ளதாகவும், இதனால் விவசாயிகளுக்கு பெரும் பொருளாதார இழப்பு ஏற்பட்டுள்ளதாகவும் தெரிவித்துள்ளார்.
விவசாயிகளுக்கு ஏக்கருக்கு ரூ.25 ஆயிரம் குறுவை நிவாரணம் வழங்க வேண்டும், பயிர் காப்பீட்டுக்கான பிரீமியம் தொகையை அரசே ஏற்க வேண்டும், சம்பா சாகுபடிக்கான விதை, உரம், பூச்சிக்கொல்லி உள்ளிட்ட இடுபொருட்களை மானியமாக வழங்க வேண்டும் உள்ளிட்ட கோரிக்கைகளையும் அவர் முன்வைத்துள்ளார்.
இதனை வலியுறுத்தி, வரும் 2026 ஆகஸ்ட் 3-ம் தேதி காலை 10 மணிக்கு தஞ்சாவூர் பனகல் கட்டடம் அருகே திமுக சார்பில் கண்டன ஆர்ப்பாட்டம் நடைபெறும் என அறிவிக்கப்பட்டுள்ளது. இந்த போராட்டத்திற்கு திமுக இளைஞரணி செயலாளரும், சட்டப்பேரவை எதிர்க்கட்சித் தலைவருமான உதயநிதி ஸ்டாலின் தலைமை வகிப்பார் என தெரிவிக்கப்பட்டுள்ளது.
காவிரி டெல்டா மாவட்டங்களைச் சேர்ந்த நிர்வாகிகள், விவசாய சங்க பிரதிநிதிகள் மற்றும் விவசாயிகளின் கோரிக்கைகளுக்கு ஆதரவளிக்கும் அனைத்து தரப்பினரும் இந்த போராட்டத்தில் பங்கேற்க வேண்டும் என மு.க. ஸ்டாலின் அழைப்பு விடுத்துள்ளார்.
மேலும், இந்த ஆர்ப்பாட்டம் விவசாயிகளின் குரலை அரசின் கவனத்திற்கு கொண்டு செல்லும் முதல் கட்ட நடவடிக்கை என்றும், அரசு தொடர்ந்து அலட்சியம் காட்டினால் மிகப்பெரிய போராட்டங்களை எதிர்கொள்ள வேண்டியிருக்கும் என்றும் அவர் எச்சரிக்கை விடுத்துள்ளார்.
