மாணவர் போராட்டத்தில் பெல்லட் துப்பாக்கி பயன்படுத்த அனுமதி அளித்தது யார்? – ராகுல் காந்தி கேள்வி
டெல்லி ஜந்தர் மந்தரில் நடைபெற்ற மாணவர் போராட்டத்தில் பெல்லட் துப்பாக்கி பயன்படுத்தப்பட்டதாக கூறப்படும் விவகாரத்தில் மத்திய அரசை நோக்கி மக்களவை எதிர்க்கட்சித் தலைவர் ராகுல் காந்தி கடும் கேள்விகளை எழுப்பியுள்ளார். மாணவர்கள் மீது மேற்கொள்ளப்பட்ட தாக்குதலுக்கு மத்திய அரசு பொறுப்பேற்க வேண்டும் என்றும், இதற்கு யார் அனுமதி வழங்கினர் என்பது குறித்து விளக்கம் அளிக்க வேண்டும் என்றும் அவர் வலியுறுத்தியுள்ளார்.
இதுதொடர்பாக மத்திய உள்துறை அமைச்சர் அமித் ஷாவுக்கு ராகுல் காந்தி எழுதியுள்ள கடிதத்தில், ஜந்தர் மந்தரில் அமைதியான முறையில் போராட்டத்தில் ஈடுபட்ட மாணவர்கள் மீது நடத்தப்பட்ட தாக்குதல் மிகவும் கண்டனத்துக்குரியது என்று குறிப்பிட்டுள்ளார். மேலும், போராட்டத்தில் ஈடுபட்ட மாணவர்கள் மீது உயிருக்கு ஆபத்தான பெல்லட் துப்பாக்கி பயன்படுத்தப்பட்டதாகவும் அவர் குற்றம்சாட்டியுள்ளார்.
இந்த தாக்குதலில் காயமடைந்த 19 வயது மாணவர் ஒருவர் கடுமையான உடல்நல பாதிப்புக்கு உள்ளாகியிருப்பதாகவும், பெல்லட் குண்டு தாக்கியதால் அவரது பார்வை பாதிக்கப்படும் அபாயம் இருப்பதாக மருத்துவர்கள் தெரிவித்துள்ளதாகவும் ராகுல் காந்தி தனது கடிதத்தில் குறிப்பிட்டுள்ளார். இந்த சம்பவம் மாணவர்களின் பாதுகாப்பு குறித்து தீவிர கவலையை ஏற்படுத்தியுள்ளதாகவும் அவர் தெரிவித்துள்ளார்.
டெல்லியில் பாதுகாப்புப் பணியில் ஈடுபட்டுள்ள படைகள் மத்திய உள்துறை அமைச்சகத்தின் கட்டுப்பாட்டில் செயல்படுகின்றன என்பதால், மாணவர்கள் மீது பெல்லட் துப்பாக்கி உள்ளிட்ட வன்முறை நடவடிக்கைகளை மேற்கொள்ள அனுமதி வழங்கியது யார் என்று ராகுல் காந்தி நேரடியாக கேள்வி எழுப்பியுள்ளார். இதற்கு உள்துறை அமைச்சர் அனுமதி அளித்தாரா அல்லது வேறு யாராவது அதிகாரம் வழங்கினரா என்பதையும் அவர் விளக்குமாறு கேட்டுக் கொண்டுள்ளார்.
மேலும், போராட்டத்தின் போது சாதாரண உடையில் இருந்த சிலர் மாணவர்களை லத்தியால் தாக்கியதாகவும், அவர்கள் காவல்துறையினரா அல்லது தன்னார்வலர்களா என்பதையும் தெளிவுபடுத்த வேண்டும் என்று ராகுல் காந்தி வலியுறுத்தியுள்ளார். மாணவர்கள் மீது பலம் பயன்படுத்தப்பட்ட விதம் குறித்து முழுமையான விசாரணை நடத்தி உண்மையை வெளிக்கொணர வேண்டும் என்றும், சம்பவத்திற்கு பொறுப்பானவர்கள் மீது உரிய நடவடிக்கை எடுக்க வேண்டும் என்றும் அவர் தனது கடிதத்தில் வலியுறுத்தியுள்ளார்.
