தகுதி நீக்க மனு விவகாரம்: பழனிசாமி மற்றும் 4 முன்னாள் எம்எல்ஏக்களுக்கு நேரில் ஆஜராக அழைப்பு
அதிமுக பொதுச்செயலாளர் பழனிசாமி மற்றும் அக்கட்சியைச் சேர்ந்த முன்னாள் எம்எல்ஏக்கள் 4 பேர், தகுதி நீக்க மனு தொடர்பாக வரும் ஜூலை 30-ம் தேதி சட்டப்பேரவைத் தலைவர் முன்பு நேரில் விளக்கம் அளிக்க வேண்டும் என்று சட்டப்பேரவை செயலர் அழைப்பு விடுத்துள்ளார்.
தமிழக சட்டப்பேரவை தேர்தலில் அதிமுக 47 இடங்களிலும், தவெக 108 இடங்களிலும் வெற்றி பெற்றதாக கூறப்படும் நிலையில், ஆட்சி அமைப்பதற்கான பெரும்பான்மையை உறுதி செய்ய கூடுதல் ஆதரவு தேவைப்பட்டதாக தெரிவிக்கப்பட்டது. இதன் காரணமாக அதிமுக எம்எல்ஏக்களின் ஆதரவை தவெக தரப்பு கோரியதாக கூறப்படுகிறது.
கடந்த மே 13-ம் தேதி சட்டப்பேரவையில் முதல்வர் விஜய் கொண்டு வந்த தவெக அரசின் மீதான நம்பிக்கை தீர்மானத்தின் போது, சி.வி. சண்முகம் தலைமையிலான அணியைச் சேர்ந்த சில அதிமுக எம்எல்ஏக்கள் அரசுக்கு ஆதரவாக வாக்களித்தனர். அதே நேரத்தில் பழனிசாமி தலைமையிலான 22 எம்எல்ஏக்கள் நம்பிக்கை தீர்மானத்திற்கு எதிராக வாக்களித்தனர்.
கட்சித் தலைமையின் உத்தரவை மீறி தவெக அரசுக்கு ஆதரவாக வாக்களித்த 25 அதிமுக எம்எல்ஏக்கள் மீது கட்சித் தாவல் தடுப்பு சட்டத்தின் கீழ் நடவடிக்கை எடுக்க வேண்டும் என்று பழனிசாமி தரப்பில் இருந்து சட்டப்பேரவைத் தலைவரிடம் மனு அளிக்கப்பட்டது.
இதற்கிடையில், சி.வி. சண்முகம் அணியைச் சேர்ந்த இசக்கி சுப்பையா, மரகதம் குமரவேல், சத்யபாமா மற்றும் ஜெயக்குமார் ஆகிய 4 எம்எல்ஏக்கள் தங்களது பதவிகளை ராஜினாமா செய்து தவெக கட்சியில் இணைந்தனர். இதனால், இவர்களுக்கு எதிரான தகுதி நீக்க நடவடிக்கை தொடர்பான விசாரணை தொடர்ந்து நடைபெற்று வருகிறது.
மற்ற 21 எம்எல்ஏக்கள் மன்னிப்பு கடிதம் அளித்ததை தொடர்ந்து, அவர்கள் மீது கட்சித் தாவல் தடுப்பு சட்டத்தின் கீழ் நடவடிக்கை எடுக்கக் கோரிய மனுவை பழனிசாமி தரப்பு திரும்பப் பெற்றதாக தெரிவிக்கப்பட்டுள்ளது.
இந்நிலையில், முன்னாள் எம்எல்ஏக்கள் 4 பேரிடம் கூடுதல் விளக்கம் பெற சட்டப்பேரவைத் தலைவர் முடிவு செய்துள்ளார். இதையடுத்து, வரும் ஜூலை 30-ம் தேதி சட்டப்பேரவைத் தலைவர் அறையில் நேரில் ஆஜராகி விளக்கம் அளிக்க வேண்டும் என சட்டப்பேரவை செயலர் இரா. சாந்தி கடிதம் அனுப்பியுள்ளார்.
அதேபோல், இந்த விவகாரம் தொடர்பாக அதிமுக பொதுச்செயலாளர் பழனிசாமியும் நேரில் வந்து விளக்கம் அளிக்க வேண்டும் என்று சட்டப்பேரவை செயலர் அழைப்பு விடுத்துள்ளார். இதனால், தகுதி நீக்க மனு தொடர்பான அடுத்தகட்ட நடவடிக்கைகள் அரசியல் வட்டாரத்தில் முக்கிய கவனத்தை பெற்றுள்ளன.
