காவிரி நீர் பங்கீடு மற்றும் மேகேதாட்டு விவகாரம்: ஆகஸ்ட் 3-இல் கர்நாடக முதலமைச்சருடன் முதல்வர் விஜய் சந்திப்பு
உச்ச நீதிமன்றத் தீர்ப்பின்படி தமிழகத்திற்குக் கிடைக்க வேண்டிய காவிரி நதிநீரைத் திறப்பது மற்றும் மேகேதாட்டு அணை விவகாரம் குறித்து விவாதிப்பதற்காகத் தமிழக முதலமைச்சர் விஜய், கர்நாடக முதலமைச்சர் டி.கே.சிவகுமாரை வரும் ஆகஸ்ட் 3-ஆம் தேதி பெங்களூரில் சந்திக்கவுள்ளார். தென்மேற்கு பருவமழை பொய்த்ததைக் சுட்டிக்காட்டி தமிழகத்திற்கு நீர் திறக்க கர்நாடகா மறுத்து வரும் சூழலில், இந்தச் சந்திப்பு நடைபெற உள்ளதை தமிழக வேளாண்மைத் துறை அமைச்சர் ஆர். வினோத் கும்பகோணத்தில் செய்தியாளர்களிடம் அதிகாரப்பூர்வமாக உறுதிப்படுத்தியுள்ளார்.
காவிரி மேலாண்மை ஆணைய உத்தரவின்படி தமிழகத்திற்கு மாதந்தோறும் நீர் வழங்கிட வேண்டும் என்ற போதிலும், நட ஆண்டில் கர்நாடக அணைகளில் 53 சதவீத நீரே இருப்பதாகவும், போதிய மழை இல்லாததால் தண்ணீரைத் திறக்க முடியாது என்றும் அம்மாநில அரசு கூறி வருகிறது. கடந்த ஜூலை 22 நிலவரப்படி 3.5 டிஎம்சி நீர் மட்டுமே திறக்கப்பட்டுள்ள நிலையில், கூடுதலாக 3 டிஎம்சி நீர் திறக்கப்பட்டிருக்க வேண்டும் என தமிழக நீர்ப்பாசன அதிகாரிகள் தெரிவிக்கின்றனர். இந்நிலையில்தான், தமிழகத்தின் உரிமைகளை விட்டுக்கொடுக்காமல் கேட்டுப் பெறுவதற்காகவும் மேகேதாட்டு அணை திட்டத்திற்குத் தன் எதிர்ப்பைப் பதிவு செய்யவும் முதலமைச்சர் விஜய் இப்பேச்சுவார்த்தையை மேற்கொள்கிறார்.
முன்னதாக 1996-இல் கருணாநிதி – ஜே.எச். படேல், 2012-இல் ஜெயலலிதா – ஜெகதீஷ் ஷெட்டர் மற்றும் 2016-இல் எடப்பாடி பழனிசாமி – சித்தராமையா ஆகியோரின் சந்திப்புகளுக்குப் பிறகு, கடந்த 10 ஆண்டுகளாக இரு மாநில முதலமைச்சர்களும் காவிரி விவகாரம் குறித்துச் சந்தித்துப் பேசவில்லை. நீண்ட இடைவெளிக்குப் பிறகு இரு மாநில முதலமைச்சர்களும் நேரில் சந்தித்துப் பேசவுள்ளது காவிரி நீர் விவகாரத்தில் மிக முக்கியமான நகர்வாகப் பார்க்கப்படுகிறது.
