“தேவையின்றி வெளியே வர வேண்டாம்!” – சுட்டெரிக்கும் வெயில் காரணமாகச் சென்னை மாநகராட்சி அவசர வழிகாட்டுதல்!
சென்னை:
தமிழகத்தில் வெயிலின் தாக்கம் நாளுக்கு நாள் தீவிரமடைந்து வரும் நிலையில், பொதுமக்கள் யாரும் மதிய நேரங்களில் தேவையின்றி வீட்டை விட்டு வெளியே செல்வதைத் தவிர்க்க வேண்டும் என்று சென்னை மாநகராட்சி அதிகாரப்பூர்வமாக அறிவுறுத்தியுள்ளது. நடப்பு கோடை வெப்பத்தின் தீவிரத்தை எதிர்கொள்ளவும், பொதுமக்களின் பாதுகாப்பை உறுதி செய்யவும் சென்னை மாநகராட்சி நிர்வாகம் சார்பில் சில முக்கிய வழிகாட்டுதல்கள் வெளியிடப்பட்டுள்ளன. கோடை வெயிலின் காரணமாக உடலில் இருந்து அதிக வியர்வை வெளியேறும்போது உப்புச்சத்து மற்றும் நீர்ச்சத்து பற்றாக்குறை (Dehydration) ஏற்படும் என்றும், இதன் விளைவாகத் தீவிர தாகம், கடுமையான தலைவலி மற்றும் உடல் சோர்வு போன்ற உடல்நல பாதிப்புகள் ஏற்படக்கூடும் என்றும் மாநகராட்சி எச்சரித்துள்ளது.
இதனைத் தவிர்க்கும் பொருட்டு, வெளியில் வேலை செய்பவர்கள் மற்றும் பொதுமக்கள் அனைவரும் அடிக்கடி தண்ணீர் குடிக்க வேண்டும் என்றும், தாகம் எடுக்காவிட்டாலும் கூட உடலில் நீர்ச்சத்தைத் தக்கவைக்கப் போதிய அளவு நீரைக் கட்டாயம் பருக வேண்டும் என்றும் மாநகராட்சி நிர்வாகம் கேட்டுக்கொண்டுள்ளது. மேலும், வீடுகளிலோ அல்லது பொது இடங்களிலோ கடுமையான வெயில் காரணமாக எவரேனும் மயக்கமடைந்தால், உடனடியாக 108 ஆம்புலன்ஸ் சேவைக்கு அழைத்து மருத்துவ உதவி பெற வேண்டும் என்றும் அறிவுறுத்தப்பட்டுள்ளது. மிக முக்கியமாக, வெயிலால் பாதிக்கப்பட்டவர்களுக்கு மருத்துவர்களின் ஆலோசனையின்றி ‘ஆஸ்பிரின்’ (Aspirin) அல்லது ‘பாராசிட்டமால்’ (Paracetamol) போன்ற மாத்திரைகளை சுய விருப்பத்தின் பேரில் எக்காரணம் கொண்டும் கொடுக்கக் கூடாது என்றும் சென்னை மாநகராட்சி தனது வழிகாட்டுதலில் திட்டவட்டமாக வலியுறுத்தியுள்ளது.
