அதிமுகவில் அடுத்த அதிரடி? – எம்.எல்.ஏ பதவியை ராஜினாமா செய்ய சி.வி.சண்முகம் திட்டம் எனப் பரபரப்பு!
விழுப்புரம்:
அதிமுகவின் மூத்த தலைவரும் முன்னாள் அமைச்சருமான சி.வி.சண்முகம் தனது எம்.எல்.ஏ பதவியை ராஜினாமா செய்யத் திட்டமிட்டுள்ளதாக வெளியாகி வரும் தகவல்கள் தமிழக அரசியல் வட்டாரத்தில் பெரும் பரபரப்பை ஏற்படுத்தியுள்ளன. முன்னதாக, அதிமுக எம்.எல்.ஏ-க்கள் சிலர் தங்கள் பதவிகளை ராஜினாமா செய்துவிட்டு ஆளுங்கட்சியான தவெக-வில் இணைந்த சம்பவம் பெரும் அதிர்வலைகளை ஏற்படுத்தியிருந்தது. இந்தச் சூழலில், எடப்பாடி பழனிசாமி மற்றும் எஸ்.பி.வேலுமணி தரப்பினர் தங்களுக்குள் சமரசம் செய்துகொண்டு, சபாநாயகரிடம் அளிக்கப்பட்டிருந்த கொறடா தொடர்பான இருதரப்பு மனுக்களையும் திரும்பப் பெற்றுக்கொண்டு ஒன்றிணைந்தனர்.
இருப்பினும், அதிமுகவின் இந்த முக்கிய சமரச சந்திப்புகள் மற்றும் சபாநாயகர் சந்திப்பு எதிலும் சி.வி.சண்முகம் கலந்து கொள்ளாமல் முற்றிலும் புறக்கணித்தது பேசுபொருளானது. கட்சித் தலைமை எடுத்த இந்த திடீர் சமரச முடிவுகளால் கடும் அதிருப்தியடைந்த அவரை, கட்சியின் மூத்த தலைவர்கள் பலரும் நேரில் சென்று சமாதானப்படுத்த முயன்றனர். ஆனால், அவர்களின் சமாதானத்தை ஏற்க மறுத்த சி.வி.சண்முகம் கடும் கோபத்துடன் அங்கிருந்து வெளியேறியதோடு, இதுகுறித்து செய்தியாளர்கள் எழுப்பிய கேள்விகளுக்கும் எவ்விதப் பதிலும் அளிக்க மறுத்துவிட்டார். கட்சித் தலைமையின் தற்போதைய செயல்பாடுகள் மீது நிலவும் இந்த உச்சக்கட்ட அதிருப்தி காரணமாகவே அவர் தனது எம்.எல்.ஏ பதவியை ராஜினாமா செய்யத் துணிந்துள்ளதாகத் தகவல்கள் கசிந்து, அதிமுக வட்டாரத்தில் பெரும் பதற்றத்தை உருவாக்கியுள்ளது.
