“இப்போதே செய் அல்லது எப்போதும் முடியாது” – திடக்கழிவு மேலாண்மை விதிகளை ஏப்ரல் 1 முதல் அமல்படுத்த உச்ச நீதிமன்றம் அதிரடி!
நாடு முழுவதும் திடக்கழிவு மேலாண்மை விதிகளை வரும் ஏப்ரல் 1-ஆம் தேதி முதல் தீவிரமாக அமல்படுத்த வேண்டும் என்று அனைத்து மாநில அரசுகளுக்கும் உச்ச நீதிமன்றம் அதிரடி உத்தரவு பிறப்பித்துள்ளது. தேசிய பசுமைத் தீர்ப்பாயத்தின் கழிவு மேலாண்மை தொடர்பான வழக்குகளை விசாரித்த நீதிபதிகள், சுற்றுச்சூழலைப் பாதுகாக்க இப்போதே செயல்படாவிட்டால் எப்போதும் மாற்றத்தை ஏற்படுத்த முடியாது என்ற வேகத்தில் பணிகளை முடிக்க வேண்டும் என அறிவுறுத்தினர்.
நீதிமன்றத்தின் இந்த புதிய வழிகாட்டுதலின்படி, இனி குப்பைகளை ஈரமான குப்பை, உலர்ந்த குப்பை, சுகாதார கழிவுகள் மற்றும் சிறப்பு கவனம் தேவைப்படும் கழிவுகள் என நான்கு வகைகளாகப் பிரித்து வழங்க வேண்டும். இதற்காக உள்ளாட்சி அமைப்புகள் நான்கு தனித்தனி அறைகளைக் கொண்ட பிரத்யேக வாகனங்களைப் பயன்படுத்தி குப்பைகளைச் சேகரிக்க வேண்டும் என்றும் உத்தரவிடப்பட்டுள்ளது. குப்பைகளைத் தரம் பிரிப்பதை உறுதி செய்யும் பொறுப்பு அந்தந்த பகுதி மேயர்கள், வார்டு உறுப்பினர்கள் மற்றும் கவுன்சிலர்களுக்கு வழங்கப்பட்டுள்ளது.
மேலும், மாவட்ட ஆட்சியர்கள் இப்பணிகளை முறையாக ஆய்வு செய்து மாநில தலைமைச் செயலாளர்களுக்கு அறிக்கை தாக்கல் செய்ய வேண்டும். இந்த விதிகளைப் பின்பற்றத் தவறும் அதிகாரிகள் மீது சுற்றுச்சூழல் சட்டங்களின் கீழ் கடுமையான குற்றவியல் நடவடிக்கை மற்றும் சிறைத் தண்டனை விதிக்கப்படும் என்றும் நீதிபதிகள் எச்சரித்துள்ளனர். ஏப்ரல் 1 முதல் இந்த நடைமுறைகள் முழு வீச்சில் அமலுக்கு வருவதை உறுதி செய்ய மாநில அரசுகள் இப்போதே பணிகளைத் தொடங்க வேண்டும் என்று உச்ச நீதிமன்றம் வலியுறுத்தியுள்ளது.
