Su-57 போர் விமானத் திட்டம்: இந்தியாவுடன் இணைந்து உள்நாட்டிலேயே தயாரிக்கத் தயார் என புதின் அதிரடி அறிவிப்பு!
ரஷ்யாவின் அதிநவீன ஐந்தாம் தலைமுறை ஸ்டெல்த் போர் விமானமான ‘சுகோய் Su-57’ ஐ, இந்தியாவின் ‘மேக் இன் இந்தியா’ திட்டத்தின் கீழ் இணைந்து தயாரிக்கத் தயாராக இருப்பதாக ரஷ்ய அதிபர் விளாடிமிர் புதின் அதிரடியாக அறிவித்துள்ளார். நிலம், வான் மற்றும் கடல்வழி இலக்குகளைத் துல்லியமாகத் தாக்கும் திறன், எதிரி ரேடார்களில் சிக்காத ஸ்டெல்த் தொழில்நுட்பம் கொண்ட இந்த விமானம், அமெரிக்காவின் F-35 மற்றும் சீனாவின் J-35 ஆகியவற்றுக்குக் கடுமையான போட்டியாகும். முன்னதாக, 2018-ல் தொழில்நுட்பத் திருப்தியின்மை காரணமாக இந்த கூட்டுத் தயாரிப்பில் இருந்து இந்தியா விலகியிருந்த நிலையில், தற்போது இந்தியாவின் விமானப்படைத் திறனை வலுப்படுத்தும் நோக்கில் இந்த முக்கிய அறிவிப்பை ரஷ்யா வெளியிட்டுள்ளது.
சொந்தமாக ‘ஏம்கா’ (AMCA) எனப்படும் ஐந்தாம் தலைமுறை மேம்பட்ட நடுத்தர ரக போர் விமானத்தை 2030-க்குள் உருவாக்கும் முயற்சியில் இந்தியா தீவிரமாக ஈடுபட்டு வரும் வேளையில், ரஷ்யாவின் இந்தச் சலுகை மிக முக்கியத்துவம் வாய்ந்ததாகப் பார்க்கப்படுகிறது. இந்த புதிய ஒப்பந்தத்தின்படி, Su-57 போர் விமானத்தின் முழுமையான மூலக் குறியீடு (Source Code) மற்றும் அதிநவீன தொழில்நுட்பங்களை எவ்வித நிபந்தனைகளும் கட்டுப்பாடுகளும் இன்றி இந்தியாவுக்கு வழங்க ரஷ்யா அதிகாரப்பூர்வமாகச் சம்மதித்துள்ளது. உள்நாட்டிலேயே தயாரிப்பதற்கான முழுத் தொழில்நுட்ப மாற்றீடு (Transfer of Technology) உள்ளிட்ட இந்தியாவின் அனைத்து நிபந்தனைகளையும் ஏற்றுக்கொள்ள ரஷ்ய அதிகாரிகள் பச்சைக்கொடி காட்டியுள்ளனர்.
அமெரிக்க அதிபர், பிரதமர் மோடியிடம் தங்களின் F-35 ரக போர் விமானங்களை வழங்கத் தயார் எனத் தெரிவித்திருந்த சூழலில், ரஷ்யா இந்த அதிரடி நகர்வை மேற்கொண்டுள்ளது. தற்போதைய நிலவரப்படி, சுமார் 50 Su-57 போர் விமானங்களை ரஷ்யாவிடமிருந்து நேரடியாகக் கொள்முதல் செய்வது குறித்தும், இந்தியாவில் இவற்றை உற்பத்தி செய்வதற்கான முதலீட்டு விவரங்கள் குறித்தும் இருநாடுகளும் தீவிரமாக ஆய்வு செய்து வருகின்றன. பரஸ்பர நலன்களைப் பேணும் வகையில், இந்தியாவிற்குத் தேவைப்படும் அனைத்து விதமான அதிநவீன ராணுவ உபகரணங்களையும் தங்கு தடையின்றி வழங்க ரஷ்யா எப்போதும் தயாராக உள்ளதாக ரஷ்யாவின் ரோஸ்டெக் பாதுகாப்பு கூட்டமைப்பின் CEO செர்ஜி செமேசோவ் உறுதிபடத் தெரிவித்துள்ளார்.
