“டாஸ்மாக் கடைகள் இரவு 10 மணிக்குள் கட்டாயம் மூடப்பட வேண்டும்” – சென்னை காவல் ஆணையர் அதிரடி உத்தரவு!
சென்னை:
சென்னையில் உள்ள டாஸ்மாக் கடைகள் மற்றும் பார்கள் அனைத்தும் அரசால் நிர்ணயிக்கப்பட்ட நேரக் கட்டுப்பாட்டுக்குள் கட்டாயமாக மூடப்பட வேண்டும் என அனைத்து காவல் அதிகாரிகளுக்கும் சென்னை காவல் ஆணையர் அதிரடி உத்தரவு பிறப்பித்துள்ளார்.
இது தொடர்பாக சென்னை காவல் ஆணையர் அலுவலகத்தில் இருந்து அனைத்து காவல் நிலையங்களுக்கும் அனுப்பப்பட்டுள்ள முக்கிய சுற்றறிக்கையில் கூறப்பட்டுள்ளதாவது:
டாஸ்மாக் மற்றும் பார்களுக்கான நேரக் கட்டுப்பாடு:
- FL1 கடைகள் (சாதாரண டாஸ்மாக் கடைகள்): இரவு 10:00 மணிக்குள் கட்டாயமாக மூடப்பட வேண்டும்.
- FL2 கடைகள் (பார் வசதி கொண்டவை): இரவு 11:00 மணிக்குள் மூடப்பட வேண்டும்.
- FL3 கடைகள் (நட்சத்திர விடுதி பார்கள்): நள்ளிரவு 12:00 மணிக்குள் மூடப்பட வேண்டும்.
இந்த நேரக் கட்டுப்பாடுகளை அந்தந்தப் பகுதிக்கு உட்பட்ட ரோந்து வாகனங்கள் (Patrol, Gipsy Patrol, Additional Patrol) மற்றும் செக்டர் பீட் அதிகாரிகள் (Sector Beat Officers) நேரடியாகச் சென்று கண்காணிக்க வேண்டும். கடைகள் மற்றும் பார்கள் உரிய நேரத்தில் மூடப்பட்டதை உறுதி செய்து, அதனைப் புகைப்பட ஆதாரங்களுடன் (Photo Proof) பதிவேற்றம் செய்ய வேண்டும் என அறிவுறுத்தப்பட்டுள்ளது.
அதிகாரிகளுக்கு எச்சரிக்கை மற்றும் அதிரடி நடவடிக்கைகள்:
- சட்டவிரோத மது விற்பனைக்குத் தடை: பார்களில் சில்லறை முறையில் மது விற்பனை செய்வது (“Loose Selling”) முற்றிலும் தடை செய்யப்பட்டுள்ளது. இந்த விதிமுறையை மீறி சட்டவிரோத விற்பனை நடைபெற்றால், சம்பந்தப்பட்ட பகுதி ரோந்து அதிகாரிகள் மீது கடுமையான துறை ரீதியான நடவடிக்கை எடுக்கப்படும் என எச்சரிக்கப்பட்டுள்ளது.
- குண்டர் சட்ட விதிமுறைகள்: குற்றவாளிகள் மீது குண்டர் சட்டத்தின் (Goondas Act) கீழ் நடவடிக்கை எடுப்பதற்கான முன்மொழிவுகளை, உதவி ஆணையர்கள் (Assistant Commissioners) முறையாக ஆய்வு செய்ய வேண்டும். நீதிமன்றத்தில் நிலுவையில் உள்ள வழக்குகள் மீது மட்டுமே இந்த நடவடிக்கைகளை எடுக்க வேண்டும் எனத் தெரிவிக்கப்பட்டுள்ளது.
- பட்டியலின மக்கள் மற்றும் பெண்கள் பாதுகாப்பு: எஸ்சி/எஸ்டி (SC/ST) வன்கொடுமை தடுப்புச் சட்ட வழக்குகள் குறித்து காவல் ஆணையர் நேரடியாகத் தொடர்ந்து ஆய்வு மேற்கொள்வார். மேலும், பெண்களின் பாதுகாப்பிற்காகச் செயல்படும் ‘சிங்கப்பெண் குழு’ (Singappenn Team), ‘பிங்க் ரோந்து’ (Pink Patrol) வாகனங்கள் மற்றும் போதைப்பொருள் தடுப்புப் பிரிவு (Anti Narcotic Team) ஆகியவற்றின் செயல்பாடுகள் தீவிரமாகக் கண்காணிக்கப்பட்டு, ரோந்துப் பணிகள் முறைப்படுத்தப்பட வேண்டும்.
பொதுமக்களிடம் நற்பெயர்:
காவல்துறையினர் அனைவரும் பொதுமக்களிடத்தில் கண்ணியத்துடனும், ஒழுங்குடனும், திறமையாகவும் நடந்துகொள்ள வேண்டும் என்றும்; பொதுமக்கள் மத்தியில் காவல்துறைக்குத் தொடர்ந்து நல்ல பெயர் கிடைக்கும்படி தங்களது பணிகளைச் சிறப்பாக மேற்கொள்ள வேண்டும் என்றும் சென்னை காவல் ஆணையர் தனது சுற்றறிக்கையில் திட்டவட்டமாக அறிவுறுத்தியுள்ளார்.
