தமிழக அமைச்சரவை நாளை அதிரடி விரிவாக்கம்: காங்கிரஸ் உட்பட புதிதாக 23 அமைச்சர்கள் பதவியேற்பு!
சென்னை:
தமிழகத்தில் புதிய ஆட்சி அமைந்துள்ள சூழலில், முதலமைச்சர் ஜோசப் விஜய் தலைமையிலான அமைச்சரவை நாளை (மே 21) அதிகாரப்பூர்வமாக விரிவாக்கம் செய்யப்படவுள்ளது. கூட்டணிக் கட்சிகளின் பங்களிப்புடன் நடைபெறவுள்ள இந்த முக்கிய நிகழ்வில் புதிதாக 23 சட்டமன்ற உறுப்பினர்கள் அமைச்சர்களாகப் பதவியேற்கின்றனர்.
நடந்து முடிந்த தமிழக சட்டமன்றத் தேர்தலில் 108 இடங்களைக் கைப்பற்றித் தனிப்பெரும் கட்சியாக உருவெடுத்த தமிழக வெற்றிக் கழகம் (தவெக), தனக்கு நிபந்தனையற்ற ஆதரவு அளித்த காங்கிரஸ், விடுதலைச் சிறுத்தைகள் கட்சி (விசிக), இடதுசாரிகள் மற்றும் ஐயுஎம்எல் (IUML) ஆகிய தோழமைக் கட்சிகளின் ஆதரவோடு ஆட்சி அமைத்தது. இதனைத் தொடர்ந்து, கடந்த மே 10-ஆம் தேதியன்று ஜோசப் விஜய் முதலமைச்சராகப் பொறுப்பேற்றுக் கொண்டார். அவருடன் முதற்கட்டமாக 9 அமைச்சர்கள் மட்டுமே பதவியேற்றுக் கொண்ட நிலையில், முழுமையான அமைச்சரவை விரிவாக்கம் மற்றும் தோழமைக் கட்சிகளுக்கான அதிகாரப் பகிர்வு குறித்துத் தவெக தலைமை கடந்த சில நாட்களாகத் தீவிர ஆலோசனை நடத்தி வந்தது.
காங்கிரசுக்கு 2 இடங்கள் – அமைச்சராகும் விஸ்வநாதன், ராஜேஷ்குமார்:
அமைச்சரவை பங்கீடு தொடர்பாகக் கூட்டணிக் கட்சிகளுடன் நடத்தப்பட்ட சுமுகப் பேச்சுவார்த்தையின் முடிவில், புதிய அமைச்சரவையில் தேசியக் கட்சியான காங்கிரசுக்கு 2 அமைச்சர் பதவிகளை வழங்க முதலமைச்சர் விஜய் முடிவெடுத்துள்ளார்.
அதன்படி, காங்கிரஸ் கட்சியின் மூத்த சட்டமன்ற உறுப்பினர்களான விஸ்வநாதன் மற்றும் ராஜேஷ்குமார் ஆகிய இருவருக்கும் புதிய அமைச்சரவையில் இடம் ஒதுக்கப்பட்டுள்ளது. இவர்கள் இருவரும் நாளை அமைச்சர்களாகப் பொறுப்பேற்கவுள்ளனர்.
நாளை காலை பதவியேற்பு விழா:
புதிய அமைச்சர்கள் 23 பேரின் அதிகாரப்பூர்வப் பதவியேற்பு விழா நாளை (வியாழக்கிழமை) காலை 10:00 மணிக்குச் சென்னை கிண்டியில் உள்ள ‘மக்கள் மாளிகையில்’ (ஆளுநர் மாளிகை) மிக பிரம்மாண்டமாக நடைபெறவுள்ளது. தமிழக ஆளுநர் ராஜேந்திர விஸ்வநாத் அர்லேகர் புதிய அமைச்சர்களுக்குப் பதவிப் பிரமாணமும், ரகசியக் காப்புப் பிரமாணமும் செய்து வைக்கவுள்ளார். இதற்கான விரிவான ஏற்பாடுகள் மக்கள் மாளிகையில் தற்பொழுது தீவிரமாகச் செய்யப்பட்டு வருகின்றன.
விசிக, கம்யூனிஸ்ட் கட்சிகள் அவசர ஆலோசனை:
அமைச்சரவையில் காங்கிரசுக்கான இடங்கள் உறுதி செய்யப்பட்டுள்ள நிலையில், தவெக அரசுக்கு ஆதரவளித்த மற்றொரு முக்கிய தோழமைக் கட்சியான விடுதலைச் சிறுத்தைகள் கட்சி (விசிக), இந்திய கம்யூனிஸ்ட் (CPI), மார்க்சிஸ்ட் கம்யூனிஸ்ட் (CPIM) மற்றும் இந்திய யூனியன் முஸ்லிம் லீக் (IUML) ஆகிய கட்சிகளும் புதிய அமைச்சரவையில் தங்களது பங்களிப்பை உறுதி செய்வது குறித்தும், தங்களுக்கு ஒதுக்கப்படும் துறைகள் குறித்தும் தங்களது கட்சித் தலைமையகங்களில் தற்பொழுது அவசர மற்றும் தீவிர ஆலோசனையில் ஈடுபட்டு வருகின்றனர்.
தமிழகத்தில் ஆட்சி மாற்றம் ஏற்பட்டதைத் தொடர்ந்து, கூட்டணிக் கட்சிகளை உள்ளடக்கி நாளை நடைபெறவுள்ள இந்த முழுமையான அமைச்சரவை விரிவாக்கம், தமிழகத்தின் அடுத்தகட்ட நிர்வாக நகர்வுகளில் மிக முக்கியமான திருப்பமாகப் பார்க்கப்படுகிறது.
