காய்கறி விற்பனையாளரிலிருந்து காமன்வெல்த் பதக்கம் வரை: ஜாண்டு குமாரின் போராட்ட வெற்றிப்பயணம்
கிளாஸ்கோவில் நடைபெற்று வரும் 23-வது காமன்வெல்த் விளையாட்டு போட்டியில் இந்தியாவுக்கு முதல் பதக்கத்தை வென்று கொடுத்து அனைவரின் கவனத்தையும் ஈர்த்துள்ளார் பிஹாரைச் சேர்ந்த 28 வயதான பாரா பவர் லிஃப்டிங் வீரர் ஜாண்டு குமார். இந்திய நேரப்படி சனிக்கிழமை அதிகாலை நடைபெற்ற போட்டியில் அவர் வெண்கலப் பதக்கத்தை கைப்பற்றினார். பதக்கம் பெற்ற தருணத்தில் அவரது கண்களில் கண்ணீர் மல்கியது, அவரது நீண்டகால போராட்டத்துக்கும் விடாமுயற்சிக்கும் கிடைத்த அங்கீகாரமாக அது அமைந்தது.
பிஹாரின் நாளந்தா மாவட்டத்தில் உள்ள ஹர்னவுத் பகுதியைச் சேர்ந்த ஜாண்டு குமார், சிறுவயதிலேயே போலியோ பாதிப்பால் கால்களின் செயல்பாட்டை இழந்தார். குடும்பத்தின் பொருளாதார சுமையை குறைக்க, அதிகாலை 4 மணிக்கே எழுந்து மொத்த சந்தையில் இருந்து காய்கறிகளை வாங்கி வந்து பகல் முழுவதும் விற்பனை செய்தார். கடினமான வாழ்க்கைச் சூழலிலும், மாலை நேரங்களில் உடற்பயிற்சி செய்வதையே தனது மகிழ்ச்சியாகக் கருதி தொடர்ந்து பயிற்சியில் ஈடுபட்டார்.
தனது இயற்பெயர் அவினாஷ் குமார் என்றும், போலியோ பாதிப்புக்குப் பிறகு பலர் தன்னை குடும்பத்திற்கு சுமை எனக் கருதியதால் “ஜாண்டு குமார்” என்ற பெயரே பரவலாக நிலைத்துவிட்டதாக அவர் முன்பு தெரிவித்திருந்தார். நடிகர் சல்மான் கானின் உடல்தகுதி தன்னை மிகவும் ஊக்கப்படுத்தியதாக கூறிய அவர், தபாங் திரைப்படத்தை பார்த்த பிறகு உடற்பயிற்சியில் தீவிர ஆர்வம் கொண்டார். ஆரம்பத்தில் பவர் லிஃப்டிங் குறித்து எந்த அறிவும் இல்லாத நிலையில், தொடர்ந்து பயிற்சி மேற்கொண்டு போட்டி உலகில் தனது பயணத்தை தொடங்கினார்.
2019-ஆம் ஆண்டு மாவட்ட அளவிலான பென்ச் பிரஸ் போட்டியில் தங்கப் பதக்கம் வென்ற ஜாண்டு குமார், அதே ஆண்டு தேசிய போட்டியில் பதக்கம் பெறத் தவறினாலும் தனது திறமையால் பயிற்சியாளர்களின் கவனத்தை ஈர்த்தார். அதன் பலனாக 2022-ஆம் ஆண்டு தேசிய பாரா பவர் லிஃப்டிங் போட்டியில் வெண்கலப் பதக்கம் வென்றார். பொருளாதார நெருக்கடி காரணமாக சரியான உணவுமுறையைப் பின்பற்ற முடியாத சூழலில் கூட, தினமும் இரண்டு முட்டைகள் சாப்பிடுவதையே தனது அதிர்ஷ்டமாக அவர் கருதினார்.
இதற்கிடையில், காய்கறி விற்பனை செய்த இடம் அரசு கட்டுமானப் பணிக்காக அகற்றப்பட்டதால், வாழ்வாதாரத்திற்காக இ-ரிக்ஷா ஓட்டத் தொடங்கினார். பின்னர் தேசிய சாம்பியன்ஷிப் போட்டிக்கான தயாரிப்பிற்காக தனது வாகனத்தையே விற்று அதில் கிடைத்த பணத்தை பயிற்சிக்காக செலவிட்டார். அந்த போட்டியில் வெற்றி கிடைக்கவில்லை என்றாலும், அவரது அர்ப்பணிப்பு இந்திய விளையாட்டு ஆணையத்தின் பயிற்சி முகாமில் இடம் பெறும் வாய்ப்பை உருவாக்கியது. அங்கு கிடைத்த முறையான பயிற்சியே அவரது விளையாட்டு வாழ்க்கையில் மிகப்பெரிய திருப்புமுனையாக அமைந்தது.
அதன் பின்னர் ஜாண்டு குமார் தொடர்ந்து முன்னேற்றம் கண்டார். 2025-ஆம் ஆண்டு தேசிய போட்டியில் 205 கிலோ எடையை தூக்கி சாதனை படைத்த அவர், கேலோ இந்தியா போட்டியில் அதை 206 கிலோவாக உயர்த்தினார். அதே ஆண்டில் உலக பாரா பவர் லிஃப்டிங் உலகக் கோப்பை தொடரிலும் வெண்கலப் பதக்கம் வென்று தனது திறமையை நிரூபித்தார். தற்போது காமன்வெல்த் விளையாட்டில் 72.4 கிலோ எடைப்பிரிவில் 130.9 புள்ளிகள் பெற்று இந்தியாவுக்கு முதல் பதக்கத்தை வென்று கொடுத்து, விடாமுயற்சி இருந்தால் எந்தச் சூழலையும் வெற்றியாக மாற்ற முடியும் என்பதை மீண்டும் ஒருமுறை உலகுக்கு உணர்த்தியுள்ளார்.
