எல்லைப் பாதுகாப்பில் ரோபோக்களை பயன்படுத்த சீனா முனைந்துள்ளது!
சீனா–வியட்நாம் எல்லையில் பாதுகாப்பு நடவடிக்கைகளை மேம்படுத்தும் நோக்கில், சுமார் 500 மனித வடிவ ரோபோக்களை காவல் பணிக்கு அனுப்ப சீன ராணுவம் தயாராகி வருகிறது.
அமெரிக்க இராணுவத்தின் தொழில்நுட்ப வளர்ச்சிக்கு இணையாக, சீன படைத் திறனும் வேகமாக உயர்ந்து கொண்டு வருகிறது. ஏற்கனவே ரோபோ நாய்களைப் பயன்படுத்தத் தொடங்கியுள்ள சீன படைகள், அடுத்த கட்டமாக ரோபோ வீரர்களையும் தங்கள் படையணியில் இணைக்க முடிவு செய்துள்ளன.
இதற்காக சீன ராணுவமும் யுபிடெக் ரோபோடிக்ஸ் நிறுவனமும் சுமார் ரூ.330 கோடி மதிப்பிலான ஒப்பந்தத்தில் கையெழுத்திட்டுள்ளன. இந்த ஒப்பந்தத்தின் படி, மனித வடிவமைப்பில் உருவாக்கப்பட்ட 500 ரோபோக்கள் இந்த வருட இறுதி காலத்திற்குள் சீன ராணுவத்திடம் ஒப்படைக்கப்படவுள்ளன.
இந்த ரோபோக்களை வியட்நாம் எல்லைப் பகுதியில் ரோந்து மற்றும் கண்காணிப்பு பணிகளில் பயன்படுத்துவதற்கான திட்டத்தையும் சீன பாதுகாப்புத்துறை உருவாக்கியுள்ளது.
