ரயிலில் ‘எலக்ட்ரிக் கெட்டில்’ மூலம் டீ தயாரித்த பெண்: வைரல் வீடியோவால் சிக்கிய பயணி!
புது தில்லி: ஓடும் ரயிலில் மொபைல் சார்ஜ் செய்யும் மின் இணைப்பில் ‘எலக்ட்ரிக் கெட்டில்’ (Electric Kettle) பயன்படுத்தி தேநீர் தயாரித்த பெண் பயணியின் வீடியோ இணையத்தில் வைரலாகி வரும் நிலையில், அவர் மீது நடவடிக்கை எடுக்க ரயில்வே நிர்வாகம் தீவிரம் காட்டி வருகிறது.
சம்பவம் என்ன?
ரயில் பயணத்தின் போது பெண் பயணி ஒருவர், தனது இருக்கைக்கு அருகே உள்ள மொபைல் சார்ஜிங் பாயிண்ட்டில் எலக்ட்ரிக் கெட்டிலை இணைத்து தேநீர் தயாரித்துள்ளார். ரயில்களில் உள்ள மின்சார பிளக்குகள் மொபைல் மற்றும் லேப்டாப் போன்ற குறைந்த மின் அழுத்தத்தைச் (Low Voltage) சமாளிக்கும் வகையில் மட்டுமே வடிவமைக்கப்பட்டவை. ஆனால், கெட்டில் போன்ற அதிக வாட்ஸ் (Watts) கொண்ட சாதனங்களைப் பயன்படுத்தும்போது, மின் சுமை (Overload) அதிகமாகி மின் கசிவு அல்லது தீ விபத்து ஏற்பட அதிக வாய்ப்புள்ளது.
ரயில்வே நிர்வாகத்தின் அதிரடி:
சக பயணி ஒருவர் இந்தச் செயலை வீடியோ எடுத்து சமூக வலைதளங்களில் பதிவிட்டார். இது இந்திய ரயில்வே வாரியத்தின் கவனத்திற்குச் சென்றது. இதையடுத்து, ‘ரயில்வே சேவா’ (Railway Seva) தனது அதிகாரப்பூர்வ எக்ஸ் (ட்விட்டர்) பக்கத்தில், “இத்தகைய செயல்கள் சக பயணிகளின் பாதுகாப்பிற்கு அச்சுறுத்தலானவை” எனக் குறிப்பிட்டுள்ளது. மேலும், அந்த வீடியோவில் உள்ள பயணியின் PNR எண் மற்றும் பயண விவரங்களைத் தெரிவிக்குமாறு வீடியோவை பதிவிட்டவரிடம் கோரியுள்ளது.
பயணிகளுக்கு எச்சரிக்கை:
சமீபகாலமாக ரயில்களில் ஹேர் டிரையர், எலக்ட்ரிக் கெட்டில் மற்றும் இண்டக்ஷன் அடுப்பு போன்றவற்றைச் சிலர் பயன்படுத்துவது கண்டறியப்பட்டு வருகிறது. இத்தகைய விதிமீறல்களில் ஈடுபடுபவர்கள் மீது ரயில்வே பாதுகாப்புப் படையினர் (RPF) மூலம் கடும் அபராதம் மற்றும் சிறைத் தண்டனை விதிக்கப்படும் என ரயில்வே துறை மீண்டும் எச்சரிக்கை விடுத்துள்ளது.
