திருச்செந்தூர் மாசித் திருவிழா: பச்சை சாத்திக் கோலத்தில் சண்முகர் வீதி உலா – ஆயிரக்கணக்கான பக்தர்கள் தரிசனம்!
திருச்செந்தூர்: அறுபடை வீடுகளில் இரண்டாம் படை வீடான திருச்செந்தூர் அருள்மிகு சுப்பிரமணிய சுவாமி திருக்கோயிலில், மாசித் திருவிழாவின் எட்டாம் நாள் நிகழ்ச்சியாக சுவாமி சண்முகர் பச்சை சாத்திக் கோலத்தில் எழுந்தருளி பக்தர்களுக்குக் காட்சியளித்தார்.
உலகப் புகழ்பெற்ற திருச்செந்தூர் மாசித் திருவிழா தற்போது கோலாகலமாக நடைபெற்று வருகிறது. விழாவின் முக்கிய நிகழ்வான எட்டாம் நாள் அதிகாலையில், சுவாமி சண்முகர் வள்ளி, தெய்வானை அம்பாள்களுடன் வெண் பட்டு உடுத்தி, வெள்ளை மலர்களால் அலங்கரிக்கப்பட்ட வெள்ளிச் சப்பரத்தில் வெள்ளை சாத்திக் கோலத்தில் எழுந்தருளினார்.
இதனைத் தொடர்ந்து, பகலில் மேலக் கோயிலில் சுவாமி சண்முகர் மற்றும் அம்பாள்களுக்குப் பிரம்மாண்டமான அபிஷேக ஆராதனைகள் நடைபெற்றன. சுமார் ஆயிரம் லிட்டர் பால் மற்றும் 2,000 கிலோ அளவிலான பல்வேறு கனிகளைக் கொண்டு மகா அபிஷேகம் வெகு விமரிசையாக நடத்தப்பட்டது. அப்போது திரண்டிருந்த ஆயிரக்கணக்கான பக்தர்கள் “வெற்றிவேல் முருகனுக்கு அரோகரா!” எனப் பக்தி முழக்கமிட்டு சுவாமி தரிசனம் செய்தனர்.
மாலையில், விழாவின் சிகர நிகழ்ச்சியாக சுவாமி சண்முகர் வள்ளி, தெய்வானை அம்பாள்களுடன் பச்சை கடைசல் சப்பரத்தில், மனதிற்கு அமைதி தரும் பச்சை சாத்திக் கோலத்தில் எழுந்தருளினார். மரகதப் பச்சை நிறத்தில் ஜொலித்த சுவாமி சண்முகர், நான்கு ரத வீதிகளிலும் உலா வந்து பக்தர்களுக்கு அருள்பாலித்தார். இந்த அரிய கோலத்தைக் காண்பதற்காகத் தமிழகத்தின் பல்வேறு பகுதிகளில் இருந்தும் லட்சக்கணக்கான பக்தர்கள் திருச்செந்தூரில் குவிந்துள்ளனர்.
