டெல்லி மதுபானக் கொள்கை வழக்கு: அரவிந்த் கெஜ்ரிவால், மணீஷ் சிசோடியா உட்பட 23 பேர் விடுதலை!
புதுடெல்லி: நாடு முழுவதும் பெரும் அரசியல் பரபரப்பை ஏற்படுத்திய டெல்லி மதுபானக் கொள்கை ஊழல் தொடர்பான வழக்கில், டெல்லி முன்னாள் முதல்வர் அரவிந்த் கெஜ்ரிவால், முன்னாள் துணை முதல்வர் மணீஷ் சிசோடியா, பி.ஆர்.எஸ் (BRS) கட்சியின் முன்னாள் எம்.எல்.சி கவிதா உள்ளிட்ட 23 பேரையும் விடுவித்து டெல்லி ரோஸ் அவென்யூ நீதிமன்றம் அதிரடி உத்தரவு பிறப்பித்துள்ளது. நீண்ட காலமாக நடைபெற்று வந்த இந்த வழக்கில், குற்றம் சாட்டப்பட்டவர்களுக்கு எதிராக சிபிஐ (CBI) தாக்கல் செய்த ஆதாரங்கள் போதுமானதாக இல்லை என்று நீதிமன்றம் கருதியுள்ளது.
இந்த வழக்கை விசாரித்த நீதிபதி, குற்றம் சாட்டப்பட்டவர்களுக்கு எதிராக விசாரணையைத் தொடர்ந்து நடத்துவதற்குத் தேவையான எவ்வித முகாந்திரமும் சிபிஐ தரப்பில் சமர்ப்பிக்கப்படவில்லை என்று குறிப்பிட்டார். இதன் அடிப்படையில், கெஜ்ரிவால் உள்ளிட்ட 23 பேரையும் வழக்கிலிருந்து விடுவிப்பதாக நீதிமன்றம் அறிவித்தது. நீண்ட சிறைவாசம் மற்றும் சட்டப் போராட்டத்திற்குப் பிறகு கிடைத்துள்ள இந்தத் தீர்ப்பு, ஆம் ஆத்மி கட்சியினரிடையே பெரும் உற்சாகத்தை ஏற்படுத்தியுள்ளது. அதேசமயம், இந்தத் தீர்ப்பை எதிர்த்து சிபிஐ மேல்முறையீடு செய்ய வாய்ப்புள்ளதாகவும் தகவல்கள் தெரிவிக்கின்றன.
