சேலத்தில் கோயில் நுழைவுவாயில் இடிப்பு: திமுக வார்டு செயலாளர் மீது நடவடிக்கை கோரிக்கை
சேலத்தில் கோயில் நுழைவு வளைவை அனுமதி இன்றி அகற்றிய திமுக வார்டு செயலாளர் மீது தக்க நடவடிக்கை எடுக்க வேண்டும் என்று இந்து முன்னணி கோட்ட பொறுப்பாளர் சந்தோஷ் குமார் வலியுறுத்தியுள்ளார்.
அம்மாபேட்டை பகுதியில் உள்ள குமரகிரி கோயிலின் நுழைவு வளைவை, திமுக வார்டு செயலாளரும் பலப்பட்டரை மாரியம்மன் கோயில் அறங்காவலர் குழு தலைவருமான சரவணன், இரவு நேரத்தில் இடித்து அகற்றியதாக குற்றச்சாட்டு எழுந்துள்ளது. இதனை சிலர் எதிர்த்து கருத்து தெரிவித்ததால், இரு தரப்பினருக்கும் இடையில் பதற்றமான நிலை உருவானது.
சம்பவத்தைத் தொடர்ந்து, இடிக்கப்பட்ட நுழைவுவாயிலை மீண்டும் அமைத்துத் தருவதாக அறங்காவலர் குழுவினர் உறுதி அளித்துள்ளனர்.
ஆனால், குற்றச்சாட்டுக்கு உட்பட்ட திமுக வார்டு செயலாளருக்கு எதிராக எந்தவித சட்ட நடவடிக்கையும் எடுக்கப்படவில்லை என்ற குற்றச்சாட்டை அப்பகுதி மக்கள் முன்வைத்துள்ளனர். இதனால் கோபமடைந்த இந்து முன்னணி உறுப்பினர்கள் மற்றும் உள்ளூர் மக்கள் நூற்றுக்கணக்கானோர் ஊர்வலமாக சென்று அம்மாபேட்டை காவல் நிலையத்தை முற்றுகையிட்டனர்.
அவர்கள், தாங்கள் அளித்த புகாரின் அடிப்படையில் சட்டரீதியான வழக்கு பதிவு செய்து நடவடிக்கை எடுக்க வேண்டும் என்றும், இல்லையெனில் தமிழகமெங்கும் இந்து முன்னணி சார்பில் போராட்டங்கள் நடத்தப்படும் என்றும் எச்சரித்துள்ளனர்.
