பாதுகாப்பு உபகரணங்களை உள்நாட்டிலேயே உருவாக்க 10 ஆண்டு குறிக்கோள்!
அடுத்த பத்து ஆண்டுகளுக்குள் ராணுவத்திற்குத் தேவையான பெரும்பாலான பாதுகாப்பு தளவாடங்களை இந்தியாவில் தயாரிக்கும் நோக்குடன், உள்நாட்டு உற்பத்தி மற்றும் ஏற்றுமதியில் நாடு வேகமாக முன்னேற்றம் காண்கிறது. இதுகுறித்த விரிவான செய்தி தொகுப்பு இதோ:
ஆத்மநிர்பர் பாரத் திட்டத்தின் மூலம், பொருளாதாரமும் தொழில்நுட்பமும் வெளிநாட்டு சார்பு இல்லாமல் உள்ளூரிலேயே பூர்த்தி செய்யப்படவேண்டும் என்பதே மத்திய அரசின் நோக்கம். உள்நாட்டு உற்பத்தி, மேக் இன் இந்தியா, ஸ்டார்ட்-அப்புகள், MSME நிறுவனங்கள், விவசாயம், பாதுகாப்பு, உட்கட்டமைப்பு, டிஜிட்டல் துறை உள்ளிட்ட பல பிரிவுகளை இணைத்து வளர்ப்பதே இந்த திட்டத்தின் அடிப்படை.
இத்திட்டத்தின் மூலம் வேலைவாய்ப்பை அதிகரித்து, இறக்குமதியை குறைத்து, உலக சந்தையில் இந்தியாவை ஒரு சக்திவாய்ந்த போட்டியாளராக உருவாக்குவதே குறிக்கோள். இதன் ஒரு பகுதியாக பாதுகாப்பு துறையில் உள்நாட்டு உற்பத்தி மிக வேகமாக உயர்கிறது. அடுத்த 10 ஆண்டுகளில் ராணுவத் தேவைகளில் பெரும்பாலான உபகரணங்களை இந்திய தயாரிப்பாக மாற்றும் திட்டம் அமல்படுத்தப்படுகிறது.
இந்தப் பற்றிப் பேசிய பாதுகாப்புத் துறை செயலர் ராஜேஷ் குமார் சிங், வருங்காலத்தில் இந்தியாவின் இறக்குமதி தேவைகள் குறைந்து, பெரும்பாலான ராணுவ உபகரணங்கள் தாயகத்தில் தயாராகும் நிலைக்கு நாடு சென்று கொண்டிருப்பதாகக் கூறினார்.
ஏராளமான பழைய உபகரணங்களைப் பயன்படுத்த வேண்டிய நிலைமைதான் இந்தியாவின் இறக்குமதி சார்பை அதிகரித்த முக்கிய காரணம் என்றும், நிதி பற்றாக்குறையால் அவற்றை மாற்ற முடியாமல் இருந்ததாகவும் அவர் விளக்கினார்.
இப்போது பாதுகாப்பு பட்ஜெட்டின் 80%-க்கும் மேற்பட்ட தொகை இந்திய நிறுவனங்களிலேயே முதலீடு செய்யப்படுகிறது. ஆண்டுதோறும் குறைந்தது 75% செலவை உள்நாட்டில் செலவிட வேண்டும் என்ற இலக்கை இது தாண்டியுள்ளது எனவும் அவர் தெரிவித்தார்.
கடந்த நிதியாண்டில் பாதுகாப்பு துறைக்கான செலவில் 85–86% பணம் இந்திய நிறுவனங்களுக்கு சென்றுள்ளது. 2023–24 ஆம் ஆண்டில் மொத்த பாதுகாப்பு உற்பத்தி ₹1,54,000 கோடியாக உயர்ந்த நிலையில், அதில் ₹1,27,434 கோடி மதிப்பிலான உற்பத்தி முழுவதும் உள்நாட்டு நிறுவனங்களிடமிருந்தே வந்துள்ளது.
2014–15 இல் ₹46,429 கோடி மட்டுமே இருந்த இந்த உற்பத்தி, தற்போது 174% உயர்ந்துள்ளது. பாதுகாப்பு ஏற்றுமதியும் அபார வளர்ச்சியடைந்துள்ளதுடன், 2014-இல் ₹1,000 கோடியில் குறைவாக இருந்த ஏற்றுமதி, 2024-இல் ₹23,622 கோடியாக உயர்ந்துள்ளது.
ஆனால் ஜெட் இஞ்சின் போன்ற மிக உயர் தொழில்நுட்ப துறைகளில் முழுமையான சுயநிறைவு சாத்தியமில்லை என்பதால், சில நம்பகமான வெளிநாடுகளின் விநியோக அமைப்புகளை நாடு தொடர்ந்து சார்ந்து இருக்க வேண்டியிருக்கும் என நிபுணர்கள் கூறுகின்றனர்.
பாதுகாப்பு புதிய நிறுவனங்களுக்கு ஏராளமான முதலீட்டாளர்கள் நிதி வழங்கி வரும் சூழலில், அரசாங்கம் தனியாக CIA போன்ற ‘வெஞ்சர் கேபிடல்’ நிறுவனத்தைத் தொடங்க வேண்டிய அவசியம் இல்லை என்பதும் வல்லுநர்களின் கருத்தாகும்.
மத்திய அரசின் தொடர்ச்சியான முயற்சிகள் காரணமாக, உள்நாட்டு பாதுகாப்பு உற்பத்தி வரலாறு காணாத உயரத்தில் உள்ளது. பட்ஜெட்டில் அதிக பங்கு இந்திய நிறுவனங்களுக்கு வழங்கப்படுவது, புதிய தொழில்நுட்ப நிறுவனங்களைத் தேர்வு செய்து கடன்கள் மற்றும் ஆர்டர்கள் வழங்குவது ஆகியவை துறையில் முதலீட்டை மேலும் உயர்த்தும் என மதிப்பிடப்படுகிறது.
ஏற்கனவே சுமார் 16 ஆயிரம் MSME நிறுவனங்கள் பாதுகாப்பு துறையில் செயல்பட்டு, உள்நாட்டு தளவாட திறனை வலுப்படுத்தி வருகின்றன. இதுவரை 462 நிறுவனங்களுக்கு 788 உரிமங்கள் வழங்கப்பட்டுள்ளன.
முடிவில், ஆத்மநிர்பர் பாரத் திட்டத்தின் கீழ் இந்தியா மேற்கொண்டு வரும் இந்த நடவடிக்கைகள், அடுத்த சில ஆண்டுகளில் பாதுகாப்பு உபகரணங்களில் வெளிநாடுகளை மிகக் குறைவாகச் சார்ந்திருக்கும் சுயநிறைவு பெற்ற நாடாக இந்தியாவை மாற்றும் என நிபுணர்கள் கருதுகின்றனர். உள்நாட்டு உற்பத்தி, ஏற்றுமதி வளர்ச்சி, ஸ்டார்ட்-அப்புகள் மற்றும் MSME-களின் பங்களிப்பு தொடர்ந்தால், இந்தியா உலக பாதுகாப்பு சந்தையில் ஒரு முக்கிய மையமாக உருவாகும் வாய்ப்பு மிக அதிகம்.
