“திமுகவுக்கு ‘செக்’ வைக்கவே அதிமுக வழக்கில் இணைந்தது” – பழனிசாமி விளக்கம்
எஸ்ஐஆர் (Special Intensive Revision) விவகாரம் தொடர்பாக உச்ச நீதிமன்றத்தில் திமுக தவறான தகவல் அளிக்கக் கூடும் என்பதால், அதைத் திருத்துவதற்காக அதிமுக வழக்கில் இணைந்ததாக கட்சியின் பொதுச் செயலாளர் எடப்பாடி கே. பழனிசாமி விளக்கம் அளித்துள்ளார்.
கோவை விமான நிலையத்தில் நேற்று செய்தியாளர்களைச் சந்தித்த அவர் கூறியதாவது:
“கோவையில் மாணவி ஒருவருக்கு கூட்டுப் பாலியல் வன்கொடுமை நடந்துள்ளது. திமுக ஆட்சியில் பெண்களுக்கும், சிறுமிகளுக்கும் பாதுகாப்பு இல்லை. 6,999 சிறுமிகள் பாலியல் வன்கொடுமைக்கு உள்ளாகி, ரூ.104 கோடி நிவாரணம் வழங்கியதாக திமுக அமைச்சர் சொன்னது பெருமையாக அல்ல — அவமானமாகும். சட்டம் ஒழுங்கு முற்றிலும் சீர்குலைந்துள்ளது.”
அவர் மேலும் கூறினார்:
“21 ஆண்டுகளுக்கு பிறகு தமிழகத்தில் வாக்காளர் பட்டியல் சிறப்பு தீவிர திருத்தம் (SIR) நடைபெறுகிறது. இதற்கு முன்பு எட்டு முறை இத்தகைய திருத்தம் நடந்துள்ளது. இதன் நோக்கம் — இறந்தவர்களையும், வீடு மாறியவர்களையும் நீக்கி தகுதியான வாக்காளர்களை பட்டியலில் சேர்ப்பதே.”
“ஆனால் திமுகவினர் இதற்கே எதிர்ப்புத் தெரிவிக்கிறார்கள். ஏன் என்றால், தகுதியானவர்கள் மட்டுமே பட்டியலில் இருந்தால் கள்ள ஓட்டுப்போட முடியாது. அதனால்தான் அவர்கள் அலறுகிறார்கள்,” என்றும் அவர் குற்றஞ்சாட்டினார்.
எஸ்ஐஆர் குறித்து உச்ச நீதிமன்றத்தில் திமுக வழக்கு தொடர்ந்துள்ளதைப் பற்றி அவர் கூறியதாவது:
“விசாரணையின் போது திமுக தவறான தகவலை பதிவு செய்தால் அதை சரி செய்யவே நாங்களும் வழக்கில் இணைந்தோம். திமுகவுக்கு ‘செக்’ வைக்க அதிமுக வழக்கில் சேர்ந்தது. திமுக தவறாக கூறினால், எங்கள் தரப்பில் நீதிமன்றத்தில் சரியான தகவலை வழங்குவோம்.”
சென்னையில் நடந்த வாக்காளர் பட்டியல் திருத்தப் பணியின் போது கள்ள ஓட்டு போட முயன்ற திமுக நிர்வாகியை முன்னாள் அமைச்சர் ஜெயக்குமார் பிடித்துக்கொடுத்ததாகவும் பழனிசாமி குறிப்பிட்டார்.
அவர் மேலும் கூறினார்:
“என் குடும்பத்தினர் யாரும் அரசியலில் தலையிடவில்லை. என் மகனோ மருமகனோ கட்சியிலும், ஆட்சியிலும் ஈடுபட்டதே இல்லை. குடும்ப அரசியல் குற்றச்சாட்டை முன்வைப்பது அர்த்தமற்றது. பாஜக ஏற்கனவே அறிவித்தது போல, தேசிய ஜனநாயகக் கூட்டணியின் தமிழக தலைமை அதிமுகவுக்கே, முதல்வர் வேட்பாளர் நானே,” என பழனிசாமி தெரிவித்தார்.
