“முதல்வர் வேட்பாளர் விவகாரத்தில் பிரதமர் மோடி கூறியது முழுக்க பொய்” எனக் காங்கிரஸ் தலைவர் மல்லிகார்ஜுன கார்கே மறுத்துள்ளார். துப்பாக்கி முனையில் யாரையும் முதல்வர் வேட்பாளராக்க காங்கிரஸ் ஒருபோதும் வற்புறுத்தாது எனவும் அவர் தெளிவுபடுத்தினார்.
பிஹாரில் நடந்த பொதுக்கூட்டத்தில், காங்கிரஸ் முதல்வர் வேட்பாளர் பதவியை ராஷ்ட்ரிய ஜனதா தளத்திடம் இருந்து இழந்துவிட்டது என்றும், துப்பாக்கி மிரட்டலில் தேஜஸ்வி யாதவை காங்கிரஸ் முதல்வர் வேட்பாளராக அறிவிக்க கட்டாயப்படுத்தப்பட்டது என்றும் பிரதமர் மோடி கூறியிருந்தார்.
இதற்கு பதிலளித்த கார்கே, “பிரதமரின் குற்றச்சாட்டு உண்மையல்ல. மோடி இப்படிப்பட்ட பொய்களை மட்டுமே கூறுகிறார். இதற்கான சரியான பதிலை நான் இன்று பிஹாரில் அளிப்பேன். துப்பாக்கி முனையில் முடிவுகள் எடுக்க காங்கிரஸ் ஒருபோதும் செய்யாது” என்றார்.
அத்துடன், “நாட்டின் பிரதமர் இவ்வளவு தாழ்ந்து இத்தகைய பேச்சுகளைச் சொல்வது வருத்தமானது. நாட்டின் முன்னேற்றம் பற்றி பேசாமல், பிஹாரில் தேர்தல் அரசியலில் மட்டுமே ஈடுபட்டுள்ளார்” எனவும் கார்கே விமர்சித்தார்.
காங்கிரஸ் தலைவர் கார்கே இன்று மாலை நடைபெறும் பிஹார் தேர்தல் பிரச்சார பொதுக்கூட்டத்தில் உரையாற்றுகிறார்.
