திமுக ஆட்சிக்கு முடிவின் கவுன்ட் டவுன் தொடங்கியது — நயினார் நாகேந்திரன்
தமிழகத்தில் திமுக அரசின் காலம் நிறைவுக்காக கவுன்ட் டவுன் ஆரம்பமாகிவிட்டதாக பாஜக மாநிலத் தலைவர் நயினார் நாகேந்திரன் தெரிவித்தார்.
ராஜராஜ சோழரின் 1040-ஆம் ஆண்டு சதய விழாவை முன்னிட்டு தஞ்சாவூரில் உள்ள அவரது சிலைக்கு மாலை அணிவித்து மரியாதை செலுத்திய பின் செய்தியாளர்களிடம் அவர் பேசினார்:
“பெரிய கோயிலுக்கு வெளியே உள்ள ராஜராஜ சோழர் சிலையை கோயிலுக்குள் மாற்றுவது குறித்து தலைவர்களுடன் ஆலோசித்து, அதன் அடிப்படையில் மத்திய அரசுக்கு பரிந்துரை செய்யப்படும்,” என்றார்.
மேலும் அவர் கூறியதாவது:
“நெல் கொள்முதல் மையங்களில் நெல் மூட்டைகள் தேங்கி முளைத்து வீணாகின்றன. விவசாயிகள் போராட்டத்தில் இருக்கின்றனர். ஆனால் முதல்வரும் துணை முதல்வரும் இதைக் கவனிக்காமல் படங்கள் பார்க்கச் செல்கின்றனர். திமுக ஆட்சி முடிவதற்கு இன்னும் 140 நாட்களே உள்ளன. இதற்கான கவுன்ட் டவுன் தொடங்கிவிட்டது. வரவிருக்கும் தேர்தலில் தேசிய ஜனநாயக கூட்டணி நிச்சயமாக வெற்றி பெறும்,” என்று தெரிவித்தார்.
அதற்கு முன்பு கும்பகோணத்தில் அவர் கூறியதாவது:
“இங்கு பல கோயில்களின் கோபுரங்கள் சீர்குலைந்து இடிந்து விழும் நிலையில் உள்ளன. அறநிலையத் துறை அமைச்சர் சேகர்பாபு இதை கவனிக்க வேண்டும். அதை விடுத்து பிற கட்சிகளை விமர்சிக்க வேண்டிய அவசியமில்லை. மழை பாதிப்பால் நஷ்டமடைந்த விவசாயிகளுக்கு குறைந்தபட்சம் ஏக்கருக்கு ₹30,000 நிவாரணம் வழங்க வேண்டும்,” என்றார்.
